Agjencia Europiane e Barnave ka kërkuar që mjekët të mos japin antibiotikë të klasës kinolone dhe fluorkinolone. Por a po zbatohet kjo në Shqipëri. Agjencia e Kontrollit të Barnave në Tiranë thotë se ka marrë masat që të gjithë të informohen.
“Kemi informuar menjëherë Urdhrin e Mjekut dhe të Faramcistit, në mënyrë që të njoftohen mjekët”, u shpreh Dajana Roshi për Top Channel.
Sipas saj edhe faramcistët duhet të shikojnë me përgjegjësi recetat që përshkruajnë mjekët dhe në rast se hasen këto antibitokë të kontaktojnë menjëherë me mjekun.
Antibiotikë të familjes kinolone dhe fluor kinolone japin efekte të pa rikuperushme pasi prekin sistemin nervor dhe atë muskulor.
Simptomat janë ënjtje të artikulacioneve, depresion, humbje të memories, humbje të shikimit dhe dëgjimit e të tjera. Në rastet kur pacienti duhet ta marrë domosdoshmërisht pasi në fakt efektshmëria e gjeneratës së re të këtyre antibiotikëve është e lartë, ai duhet të vërë re me kujdes nëse pas 48 orëve i janë shfaqur këto simptoma, pasi duhet ta ndërpresë menjëherë mjekimin me këto antibiotikë.
