Një krim i rëndë në familje goditi sot Tiranën. Dhëndri vrau vjehrrin, vjehrrën dhe më pas i dha fund jetës së tij. Vrasja e trefishtë ndodhi tek Unaza e Re në Tiranë,në rrugën Kristaq Mone . Ndërkohë që të tjera detaje nga ngjarja kanë dalë në dritë.
Raportohet se viktimat Bujar Mata dhe Valentina Mata fillimisht kanë debatuar me dhëndrin e tyre, Majlind Lalën. Thuhet se dhëndri kishte shkuar në shtëpinë e vjehrrit dhe të vjehrrës për të sqaruar një konflikt, por situata më pas precipitoi në konflikt me armë.
Majlind Lala ka qëlluar në drejtim të tyre duke i lënë të vdekur në vend. Pasi është larguar nga banesa dhëndri ka qëlluar edhe mbi veten dhe rrugës për në Spitalin e Traumës ka ndërruar jetë. Sipas policise ai është gjetur i dëmtuar poshte ballkonit te dy viktimave.
Mësohet se prej një viti, Majlind Lala bashkëjetonte me vajzën e çiftit, por nuk kishin një martesë ligjore. Në momentin e krimit vajza e çiftit të vrarë nuk ishte në shtëpinë e prindërve.
Ky është rasti i tretë i krimit në familje për këtë muaj. Një rast ka ndodhur në një familje shqiptare në Korfuz, ku një shqiptar emigrant në Greqi ka vrarë vajzën e tij duke e goditur me shufër hekuri në kokë dhe më pas e ka varrosur në oborrin e shtëpisë, pasi ishte kundër lidhjes së saj me një afgan. Në ditën e dytë të vitit Gazment Musta vrau me thikën e bukës gruan Gentiana Caushaj 31-vjeçe, dhe motrën e saj Merisa Caushaj 18-vjeçe pasi kërkoi që të shkonte tek prindërit e saj për festat.
