Përfaqësues të qeverisë në Fakultetin e Inxhinierisë së Ndërtimit, Arkitekturës dhe Urbanistikës kanë urdhëruar policinë private që të nxjerrin jashtë ambjenteve të fakultetit studentët e ngujuar.
Ky fakt bëhet me dije si pas këtij dokumenti (lexo më poshtë) të lëshuar pa vulë dhe pa numër protokolli dhe ku kërkohet ndërhyrja e policisë private për të nxjerrë jashtë studentët e ngujuar.
Më herët, një student denoncoi për mediat këtë tentativë të qeverisë, duke deklaruar se kryeministri Edi Rama ka urdhëruar Policinë që të ndërhyjë mbrëmjen e sotme për të shpërndarë studentët e ngujuar nëpër fakultete.
Studenti: Është një urdhër politik që ka ardhur direkt nga kryeministri Edi Rama që të gjithë fakultetet do të lirohen, por asnjë fakultet në Tiranë nuk do të lirohen. Fakulteti është i joni, i studentëve. I ftoj të gjithë shqiptarët ta shikojnë që sonte Policia e Shtetit do të tentojë në të gjitha mënyrat që të ndërprerë këtë ngujim të studentëve në çdo fakultet, por nuk do t’ia arrijë dot. Forca jonë është e madhe dhe ne jemi shumicë dërrmuese. Kemi mbështetjen e gjithë popullit shqiptar. Nesër nuk do të ketë mësim. T’i lënë demagogjitë politike nuk ka studentët me bindje politike. Kauza jonë do të arrijë drejt suksesit.
Qeveria po luan të gjitha gurët për të mos lejuar ngujimin e studentëve protestues në fakultete, qoftë duke i prerë dritat me anë të OSSHE-së, qoftë duke tentuar t’i nxjerrë jashtë me anë të policive private; madje duke futur dhunshëm në lojë edhe Policinë e Shtetit.
