Në mbledhjen e fundit të Këshillit të Ministrave, qeveria vendosi të rrisë pagën bazë minimale mujore me 2 mijë lekë.
Paga bruto minimale tashmë do të jetë 26 mijë lekë. Vendimi vjen 1 vit e gjysmë pas rritjes në nivelin e 24 mijë lekëve.
Pavarësisht shtimit me 2 mijë lekë, paga minimale në Shqipëri mbetet një ndër më të ulëtat të rajonit.
Disa javë më parë, ministri i Financave, Arben Ahmetja deklaronte se 55% e të punësuarve deklarohen me pagë nën 30 mijë lekë.
Vendimi
Në mbështetje të nenit 100 të Kushtetutës dhe të nenit 111, të ligjit nr.7961, datë 12.7.1995, “Kodi i Punës i Republikës së Shqipërisë”, të ndryshuar, të nenit 4, të ligjit nr.10405, datë 24.3.2011, “Për kompetencat për caktimin e pagave dhe të shpërblimeve”, me propozimin e ministrit të Financave dhe Ekonomisë, Këshilli i Ministrave
VENDOSI:
1. Paga bazë minimale mujore, për punonjësit, në shkallë vendi, që është e detyrueshme të zbatohet nga çdo person, juridik a fizik, vendas ose i huaj, të jetë 26 000 (njëzet e gjashtë mijë) lekë.
- Paga bazë minimale mujore jepet për 174 orë pune në muaj, të kryera gjatë kohës normale të punës.
- Paga bazë minimale orare të jetë 149 (njëqind e dyzet e nëntë) lekë.
- Shtesat me karakter të përhershëm jepen mbi pagën bazë.
- Vendimi nr.399, datë 3.5.2017, i Këshillit të Ministrave, “Për përcaktimin e pagës minimale në shkallë vendi”, shfuqizohet.
Ky vendim hyn në fuqi pas botimit në “Fletoren zyrtare” dhe i fillon efektet nga data 1 janar 2019.
