Francë – Protestuesit shenjojnë pikat kufitare
Tri ditë përpara Krishtlindjes, “jelekverdhët” e pakësuar ndjeshëm francezë dolën sërish në rrugë për të protestuar për të gjashtën fundjavë radhazi. Kesaj rradhe ata shënjestruan pikat kufitare. Ndërkohë një aksident fatal rrugor e çoi numrin e viktimave në 10, që prej nisjes së kësaj lëvizjeje “antiMacron” muajin e kaluar.
Rreth 38 mijë e 600 francezë morën pjesë në protestat e kësaj të shtune në Francë, në disa qytete të vendit. Numri i tyre llogaritet shumë herë më pak sesa 66 mijë protestuesit e fundjavës së kaluar. Kjo sipas shifrave të publikuara nga Ministria e Brendshme. Ajo shtoi gjithashtu se 220 persona u prangosën në mbarë vendin. 81 prej tyre vijojnë të mbeten në qelitë e paraburgimit.
Bie numri i protestuesve
Numri i demonstruesve ka ardhur gjithnjë në rënie. Rreth 282 mijë njerëz dolën në protestën e së shtunës së parë, kundër rritjes së planifikuar të çmimit të karburanteve, më 17 nëntor.
Lëvizja, e karakterizuar nga jelekët e verdhë fosforeshentë që u veshën nga protestuesit, u kthye më pas në një demonstratë mbarëkombëtare kundër politikave të presidentit Macron dhe stilit të tij qeverisës.
Ministrja e Shëndetësisë, Agnes Buzyn, foli për “Le Journal du Dimanche”. Ajo tha se qeveria e Macronit “ishte në të njëjtën linjë me kërkesat e jelekverdhëve”. Ministrja gjithashtu bëri thirrje për “dialog më konstruktiv”.
Kryeministri Edouard Philippe, ndërkohë, foli për të njëjtën gazetë. Ai tha se marrëdhënia e tij me Macronin vetëm sa është “intensifikuar” përgjatë kësaj krize. Ai përgënjeshtroi faktin se marredhenia e tyre është përkeqësuar, siç është raportuar në media. “Ne flasim përditë dhe kemi mësuar shumë gjëra të reja së fundi”, tha ai.
Rreth 2.000 protestues u bashkuan me grumbujt e njerëzve në disa rrugë në Paris, krahasuar me 4.000 gjatë javës së kaluar. E pavarësisht numrit më të pakët, me të rënë muzgu në sheshin e famshëm “Champs Elysees” shpërtheu sërish dhuna. Prrotesta shkaktoi mbylljen e dyqaneve e bizneseve që ishin ende të hapura për shkak të fundjavës përpara Krishtlindjes.
“Arrestohet kreu i jelekverdhëve”
Policia pariziene tha se kishte arrestuar 142 persona. 19 prej tyre mbeten në paraburgim, përfshi këtu edhe kreun e “jelekverdhëve” Eric Drouet. Zëdhënësi i qeverisë, Benjamin Griveaux shfrytëzoi rrjetet sociale për të shkruar se “pas dhunës fshihej e njëjta fytyrë frikacake, raciste, antisemite dhe puçiste”./Top Channel
