Dy partitë më të mëdha politike në vend, PS dhe PD kanë depozituar kërkesa për përjashtimin e liderve kundërshtarë. Ishte Partia Demokratike ajo që depozitoi e para kërkesën në Byronë e Kuvendit.
PD kërkoi përjashtimin nga seanca plenare të Kryeministrit dhe kryetarit të PS, Edi Rama. Kërkesa është firmosur nga disa deputetë, të cilët pohojnë se “gjatë seancës Rama përdori fjalor fyes dhe denigrues ndaj grupit parlamentar të PD-së”.
Sakaq, mësohet se dhe Partia Socialiste pritet të kërkojë përjashtimin e Lulzim Bashës nga seanca plenare. Taulant Balla konfirmon për News24, se grupi parlamentar do të bëjë kërkesë për përjashtim të Bashës nga Kuvendi.“PS e gjen të pavend gjuhën e përdorur nga kreu i opozitës, duke e konsideruar këtë të fundit si nxitës të akteve të dhunës”, tha Balla.
Çfarë ndodhi sot në seancë?
Seanca plenare nisi në orën 10:00. Lulzim Basha doli në foltore dhe ofendoi deputetët e PS, pasi në rendin e ditës ishte futur Kodi Zgjedhor. Basha kërkoi të hiqej nga rendi i ditës pasi drafti është i njëanëshëm dhe nuk është disktuar ende në komisione.
“Jeni të poshtër si dreqi, por bëni budallain si gomari. Çfarë? E dini fare mirë, ka një komision. Si mund ta sjellësh pa kaluar nga komisioni këtu? Çfarë po bëni ju? Shoë po bëni? E keni marrë mesazhin dje nga faktori ndërkombëtar. Jeni hileqarë, të poshtër! Do bëni ju reformë zgjedhore, ju nuk doni vettingun politik”. (lexo te plote)
Më pas e merr fjalën Kryeministri Rama, i cili nga foltorja e parlamentit u shpreh: “Grupi më ka dhënë 40 minuta për të folur, por unë do i fal liderit të opozitës, i rikthyer këtu me mandate të pjekura, por jo të djegura. Sot më shumë se asnjëherë askush më shumë se Lulëzimi s’mund tua tregojë shqiptarëve se zgjidhja e vetme është kjo shumicë, ndërsa unë do shkojë të vijoj dialogun e vështirë me studentët”.
Teksa Rama fliste shënohet incidenti. Deputeti i PD, Endri Hasa qëllon Kryeministrin me vezë. (shih fotot)
Gramoz Ruçi përjashton deputetin Hasa 10 ditë nga punimet e parlamentit. Ruçi tenton të rinisë seancën pas 10 minutash, por Hasa nuk lëvizte nga vendi i tij. Aty Ruçi lëshon edhe një gafë kur thotë “Byroja e Partisë”, teksa donte të thoshte “Byroja e Kuvendit”. (shih videon)
Më pas Ruçi vendos ta mbyllë seancën plenare dhe njofton se do të rifillojë sot pasdite në 18:00.
Deputetët e PD vendosën të qendrojnë në sallë derisa ata të mazhorancës u larguan. Pasi deputetët e PD ndejtën afro dy orë në sallën e parlamentit u larguan për të zhvilluar një mbledhje në selinë e partisë që ndodhet vetëm pak metra larg parlamentit.
/Opinion.al
