Pak ditë më parë, Eneda Tarifa ndau me të gjithë lajmin se do të largohej nga sezoni i tretë i “The Voice Kids” për t’u marrë me të tjera projekte të rëndësishme.
I pari dhe më i freskët është programi i Vitit të Ri, në RTSH, prezantimi i të cilit i është besuar Eneda Tarifës. Një spektakël i madh, maratonë, me rastin e festave të Vitit të Ri, është një fushë e njohur për Enedën, kështu që edhe ftesën për të qenë pjesë jo vetëm e moderimit, por edhe aktrimit, këngëtarja e ka pranuar me kënaqësi.
“Tok Tok 2019” e ka rikthyer Enedën në një rol të cilin ajo e njeh shumë mirë, pas disa sezoneve përvojë me trupën e Portokallisë.
Në profilin e saj në Instagram, Eneda ka ndarë me të gjithë lajmin se do të jetë në ekran për festat e fundvitit, bashkë me emra të njohur të humorit e muzikës shqiptare.
“Nata e ndërrimit të viteve na gjen në Radio Televizionin Shqptar, një program i ndërtuar me shumë batuta dhe humor. Pata fatin të punoj me kolegë të mrekullueshëm, të prezantoj, aktroj e këndoj në “TOK TOK 2019″. Një eksperiencë që më dhuroi shumë”, – shkruan këngëtarja në Instagram.
