Studentët vazhdojnë rezistencën para Kryeministrisë deri në plotësimin e kushteve të tyre. Përgjatë gjithë natës një grup studentësh kanë qendruar përpara selisë së qeverisë në kushte të vështira, për shkak të motit të ftohtë dhe me shi.
Një prej studenteve tregoi edhe për verifikimet që ka kryer policia. “Kemi vajtur tre herë në tualet, dy herët e para policia nuk na tha gjë. Herën e tretë na ndaluan, isha bashkë me një vajzë. Na kërkuan emër, mbiemër, nga jemi dhe Universitetin ku studiojmë. Na thanë se e kanë vetëm për verifikim”.
Më tej studentja tha: “Në momentin kur ikën mediat, banorët që vinin me çanta këtu për të na sjellë ushqim u kontrollonin çantat, nëse kishin dru me vete apo jo. Shkuam për të marrë dru dhe na ndaluan. Zjarr nuk kishte. E kaluam me shi, të ftohtë, pa zjarr.Derisa shiu nuk na ndaloi mbrëmë që na gjeti të papërgatitur, sot që do marrim masa nuk do na ndalojë deri në plotësimin e 8 kërkesave”.
