Zëvendëskryeministrja e Republikës së Shqipërisë Senida Mesi është takuar sot në Sofje të Bullgarisë me homologun e saj Tomislav Donchev dhe Komisioneren Europiane për Ekonominë Digjitale dhe Shoqërinë Mariya Gabriel.
Gjatë takimit me Zëvendëskryeministrin bullgar, janë konfirmuar marrëdhëniet e shkëlqyera mes dy vendeve, si dhe mbështetja e Bullgarisë për integrimin e Shqipërisë në Bashkimin Europian.
Të dy palët kanë diskutuar gjithashtu mbi mundësitë e reja në zhvillimin e marrëdhënieve ekonomike në fushën e turizmit, si dhe mbi rritjen e kontakteve mes njerëzve tanë.
Ndërmarrja e hapave konkretë në aftësimin digjital, promovimi i start up-eve dhe siguria kibernetike, kanë qenë në fokus të takimit mes Mesi dhe Komisioneres Gabriel.
Teksa Gabriel ka siguruar mbështetjen e pakursyer të BE-së ndaj Shqipërisë për të ecur në një linjë me iniciativat e axhendës digjitale europiane, Zëvendëskryeministrja Mesi ka nënvizuar vendosmërinë e qeverisë shqiptare për të sjellë rezultate konkrete në dobi të të rinjve dhe bizneseve.
