Protesta e banorëve të zonës së “Astirit” që kundërshtojnë shembjen e mbi 300 objekteve që parashikohet të prishen për t’i hapur rrugë ndërtimit të një autostrade urbane nga Sheshi Shqiponja deri te Pallati me Shigjeta, ka hyrë sot në ditën e 32-të.
Protestës i është bashkuar edhe kreu i opozitës, Lulzim Basha, i cili u shpreh se asnjë zhvillim nuk sjell ky projekt për qytetarët, përveç se mbush xhepat e oligarkëve.
Basha tha se Edi Rama dhe Erion Veliaj ka bërë gjithçka për të përçarë banorët e Unazës së Re.
Kreu i opozitës tha se kam vetëm një mesazh për banorët e Unazës së Re, Shkozës dhe studentët: Mos u dorëzoni.
“Edi Rama ka kohë që ka shkelur vijën e kuqe. Asnjë zhvillim nuk do të sjellë ky projekt. Admirim për kurajon e banorëve. Sot jemi në një betejë kundër vjedhjes ku janë ngritur edhe studentët. Kjo është një revoltë qytetare që po vlon në çdo cep të qytetit dhe në qytetet e tjera. Unë kam një mesazh se kështu beteja do fitohet. Mos u dorëzoni se të gjithë së bashku jemi më të fortë dhe do triumfojmë kundër vjedhjes tek Unaza, në universitet dhe duke rikthyer fatin tuaj. Jam i frymëzuar nga qëndresa juaj.”- tha Basha.
Për 32 ditë në përpjekje për të mbrojtur shtëpitë nga fadromat, protestuesit kanë vendosur t’u ngjajnë qytetarëve francezë, duke veshur jelekët portokalli.
Ata i kanë bërë thirrje kryeministrit Edi Rama, që të tërhiqet nga projekti që ju prish banesat e tyre, ose t’i dëmshpërblejë qytetarët me 100 për qind të vlerës së tregut.
Me thirrjet; ‘jug e veri, jemi një’ dhe ‘turp, turp’, banorët kanë bllokuar edhe sot rrugën kryesore.
“Jemi me të drejtën e fëmijëve tanë. Të gjithë kemi të drejtat tona dhe të gjithë paguajmë taksat. Duam të drejtën tonë dhe të bëjë çfarë të dojë. Nuk jemi kundër projektit, por duam djersën tonë”- u shpreh një qytetar.
‘O Edvin o legen, prite popullin se po vjen’,- ka qenë një nga thirrjet e banorëve drejtuar kryeministrit Rama.
Ata gjithashtu kanë përsëritur thirrjet: “Nuk jemi shpellarë, por jemi qytetarë”, të cilat ia drejtonin kryebashkiakut të Tiranës, Erion Veliaj, ministrit të Infrastrukturës Damian Gjiknuri dhe kryeministrit Edi Rama.
Disa nga banorët u shprehen se toka nuk është zaptuar dhe për çfarë arsye qeveria nuk erdhi për t’na shpjeguar se jemi në një truallë të huaj.
Ata deklaruan se nga kjo protestë nuk do të tërhiqen, derisa qeveria të vendosë dëmshpërblim të plotë.
Protestës së banorëve i është bashkuar që nga fillimi opozita, por edhe shoqëria civile.
Duke folur për mediat të martën pasdite, Fatos Lubonja tha se nuk është vetëm një protestë e banorëve të kësaj zone, por e gjithë shqiptarëve.
“Unë kam ardhur si qytetar dhe u bëj thirrje të gjithë qytetarëve në Tiranë e kudo në Shqipëri, se kjo është një çështje e rëndësishme. Kurajoja e protestuesve është nxitje për rezistencë edhe nga e keqja që e ka kapur vendin”, tha Lubonja gjatë një komunikimi me mediat.
Më pas, në shenjë simbolike banorët i veshën Lubonjës jelekun portokalli, një formë kjo simbolike e protestës, duke marrë shkas nga protesta në Francë kundër rritjes së çmimit të naftës.
Kurse deputeti i Partisë Demokratike, Klevis Balliu u shpreh se opozita do të mbështesë protestën e banorëve, sa kohë kauza e tyre mbrohet edhe nga Kushtetuta.
