Protesta e banorëve të Unazës së Re ka hyrë në ditën e 23-të, me thirrjet kundër qeverisë: “qeveri e korruptuar”, banorët kanë këmbëngulur në dëmshpërblimin 100 përqind të vlerës së banesave të tyre që pritet të prishen nga zgjerimi i unazës.
“Shtëpitë tona do t’i mbrojmë me gjak”, dëgjohen në kor të gjithë banorët, ndërsa lëshojnë edhe thirrje në mbështetje të 18-vjeçarit Daniel Drobaj, i cili u la sot në burg për plagosjen e polices Ina Nuka.
“O Daniel, o hero, gjithë unaza ty të do”,- brohorasin protestuesit.
Protesta u shoqërua me tensione, pasi një drejtues mjeti ka tentuar që të konfrontohet me protestuesit. Ndërkohë, situata më pas është qetësuar.
Një prej protestuesve po ashtu i ka bërë thirrje banorëve të kësaj zone që të mos bien pre e mashtrimeve nga ARRSH dhe mos t’i pranojnë përfaqësues të këtij institucioni në banesën e tyre.
Sakaq, në mbështetje të banorëve kanë shkuar edhe dy deputetë të PD-së Klevis Balliu dhe Gent Strazimiri.
