Edmond Bego, një ish-dënuar për trafik droge është sot biznesmen dhe sipas opozitës ka përfituar edhe tendera publikë. Emri i tij u bë i njohur në shtator, kur u ndalua nga policia greke dhe më pas u lirua, pasi rezultoi se e kishte kryer dënimin. Opozita akuzoi se Bego është mik i Taulant Ballës dhe prej tij ka përfituar tendera. Taulant Balla nuk e mohoi se e ka të njohur Begon dhe familjaret e tij, por mohoi ti ketë bërë favore. Opozita vazhdoi me denoncimet, duke nxjerr të dhëna nga sistemi TIMS ku Balla dhe Bego kishin udhëtuar disa here jashtë shtetit bashkë.
Deri më tani, Kryeministri Edi Rama e ka mbrojtur Taulant Ballën, duke thënë se sulmet e PD ndaj tij janë shpifje. Edhe vetë Balla ka bërë disa padi për shpifje ndaj Bashës dhe zyrtarëve të PD-së. Por fakti është se në mesin e këtij debati për lidhje të politikanëve me njerëz të dënuar, Qeveria bën hapin e radhës: Propozon ndryshime në ligj që bëjnë të pamundur marrjen e tenderave nga persona të dënuar. Pra qeveria nuk e pranon se Bego ka marrë tendera falë Taulant Ballës, por pranon se në të ardhmen atij dhe shumë të tjerëve do u bllokohet me ligj dhënia e tenderave.
Akuzat e PD për lidhjet Balla-Bego
Deklaratë e deputetit Ervin Salianji:
Edmond Bego, miku trafikant droge me 5 emra i Taulant Ballës, nuk ka përfituar vetëm para publike në kundërshtim me ligjin – 10 milionë euro dhe 6.4 miliardë lekë në 7 muajt e fundit, por ka përfituar edhe pasuri publike.
Për shumëfishimin e pasurisë së mikut trafikant droge të Taulant Ballës janë përfshirë edhe ministrat e Edi Ramës.
Damian Gjiknuri, 3 vjet më parë, atëherë kur trafikanti i drogës Bega dhe politikani Balla u bënë miq familjarë, ka firmosur leje minerare pa garë për Edmond Begon.
Leja minerare është dhënë në zonën elektorale të Taulant Ballës, në Elbasan, njësoj si shumica e punëve të tjera publike.
Sipas lejes që ka firmosur Damian Gjiknuri, miku trafikant droge i Taulant Ballës, ka të drejtë të shfrytëzojë për 25 vjet pasuritë natyrore në interes të biznesit të tij të ndërtimit, i cili duhet të ishte tani nën sekuestro nga prokuroria.
Njësoj si për lejen minerare të firmosur nga Damian Gjiknuri, PD ka sjellë fakte dhe dokumenta që provojnë se miku trafikant i Taulant Ballës e ka shumëfishuar pasurinë duke shkelur ligjin për prokurimin publik.
Ligji skualifikon nga gara çdo ofertues, të dënuar me vendim gjyqësor të formës së prerë për pjesëmarrje në organizata kriminale, si Edmond Bego.
Prokuroria, e cila po provon çdo ditë se i shërben krimit të organizuar të lidhur me pushtetin, po ndjek skenarin e Edi Ramës, duke mos nisur hetimet për Taulant Ballën per te provuar nëse ai ka qenë sekseri mes qeverisë dhe mikut trafikant, si dhe për këdo që ka shkelur ligjin duke i dhënë anëtarit të bandës kriminale të Lushnjës miliona euro punë publike dhe leje për shfrytëzim të pasurisë publike.
Për pasuritë e trafikantëve si Bega dhe politikanëve si Balla e Gjiknuri, drejtësia mund të vonojë, por me ligjin tonë antimafia, do të bëjmë që drejtësia të mos harrojë.
Deklarata e PD për udhëtimet Balla-Bego
Ervin Salianji: Është fakt që Taulant Balla ka lidhje me trafikantin ndërkombëtar të drogës Edmond Bega, i dënuar me 21 vjet burg në Itali. Taulant Balla nuk ka dhënë ende sqarime çfarë e lidh me të, si e krijoi miqësinë me të, si u bë Bega nga anëtar i bandës së Lushnjës, biznesmen i fuqishëm? Ka përfituar 13 mln euro fonde publike në zonën e Ballës. Sipas të dhënave të TIMS që regjistron hyrjet e daljet, Balla ka udhëtuar mbi 25 herë me Begën jashtë vendit, shpesh herë me të njëjtën makinë, me makinën e vetë Ballës AA 900 IN. Balla rezulton të ketë udhëtuar me Begën me të njëjtin avion me destinacion, Vjenën, Parisin, Korfuzin apo Malin e Zi.
Këto janë të dhëna nga TIMS.
Shqiptarët duhet të dinë sot se një udhëtim me CHARTER, kushton minimalisht 30 mijë Euro. Pra janë minimalisht 600 mijë euro udhëtime me CHARTER, vetëm për 18 dalje jashtë vendit të numrit dy të Partisë Socialiste, Taulantit nga Librazhdi.
Lexo edhe:
Qeveria ndryshon ligjin: Personat e dënuar nuk do të marrin më tendera
