Ministri i jashtëm grek, Nikos Kotzias, të enjten, ka folur për ngërçin e krijuar për vijushmërinë e negociatave Athinë-Tiranë.
Kotzias është shprehur se ato janë bllokuar për shkak të rezervave të presidentit shqiptar. Gjithashtu, edhe për mungesën e kuorumit të gjykatës Kushtetuese të Shqipërisë.
Kotzias i bëri këto deklarata pas takimit me homologun gjerman, Heiko Maas. Të cilin edhe e informoi në lidhje me marrëveshjen e Prespës (për emrin e Maqedonisë) dhe ecurinë e negociatave me Shqipërinë.
“Ne i bëmë negociatat me Shqipërinë. Dhe siç e dini, tani janë bllokuar. Jo nga ne, as nga ministria e Jashtme atje, por në problemet administrative që kanë, në mospajtimin e presidentit të vendit fqinj me qeverinë. Dhe në faktin se Gjykata Kushtetuese në këto momente nuk ka kuorumin e plotë për të funksionuar plotësisht”, tha Kotzias në një prononcim të shkurtër për shtyp.
Kotzias shprehu edhe njëherë përkushtimin e qeverisë aktuale greke ndaj marrëveshjes Athinë – Shkup,- raporton OraNews.
“Ne e mbështetëm dhe e mbështesim marrëveshjen e Prespës. Konsiderojmë – dhe nuk do të lodhem kurrë ta përsëris, se “historia duhet të jetë shkollë dhe jo burg”. Marrëveshja na nxorri nga burgu. Disa ëndërrojnë që të futen sërish në burg. Ne nuk do t’i ndjekim.
Kotzias nënvizoi edhe kundërshtimin e Athinës zyrtare ndaj një shkëmbimi të mundshëm të territoreve midis Kosovës e Serbisë.
“Ne nuk duam të kemi ndryshim kufijsh në rajon. Nuk duam të kemi akte që mund të shpien në domino negative. Nga ana tjetër, urojmë që të dy shtet t’i zgjidhin problemet e tyre. Dhe sigurisht, u përket vetë atyre të gjejnë mënyrën se si do t’i zgjidhin”, tha shefi i diplomacisë greke.
/Opinion.al
