Shtyrja e negociatave të BE me Shqipërinë edhe për të paktën 1 vit është interpretuar në mënyra të ndryshme nga politikanët në Shqipëri. Por çfarë thonë për vendimin që u mor në Bruksel, Fleckenstein, Vlahutin dhe Bregu.
Raportuesi për Shqipërinë në Parlamentin Europian, Knut Fleckenstein duke folur në Tiranë në një tryezë në Kuvend me temë: “Çfarë pritet nga Shqipëria pas konkluzioneve të Këshillit të BE”, tha se “ nuk është koha për të festuar”.
“Nuk është rezultati që na bën që të kërcejme dhe prandaj kjo është arsye që spo kërcejmë sot. Mendoj se ka ende shumë gjera për të bërë. Ka mbi 150 kushte të tjera përpara, derisa dera të hapet një ditë. Pra ka shumë punë, prandaj ne themi vazhdoni, nxitoni dhe të paktën kemi një vendim tani për hapjen e këtij procesi. Si partnerë afatgjatë koalicioni ju e dini sa e vështirë është të gjendet kompromisi ndonjëherë brenda koalicioneve dhe e vështirë është të gjendet kompromisi edhe në parlament. Dhe nuk besoj se kjo është një rast specifik për Shqipërinë, është histori e njohur për Shqipërinë. Por keni të drejtë nuk është bërë gjëja në mënyrë që të festojmë tani, gjithësesi rezultati është pozitiv”, tha Fleckenstein.
Ndërsa Ambasadorja e Bashkimit Europian në vendin tonë Romana Vlahutin i bëri thirrje mazhorancës ti shtrijë dorën opozitës. “Ky proces kërkon që të ketë bashkim, jo retorikë. Integrimi europian nuk është për axhenda të fshehura. E kemi parë në disa vende por dhe ketu, disa grupe interesi e kanë kuptuar se çfarë është BE, por ka dhe disa grupe qe nuk nxitojne sepse nuk e duan BE. Shumica dhe pakica duhet të bashkëpunojnë. Shumica te shtrijë dorën e dialogut, sepse pa këtë, procesi është pothuajse i pa mundur”, tha Vlahutin.
Për temën e negociatave ka folur edhe ish-ministrja e Integrimit, Majlinda Bregu e cila pak ditë më parë deklaroi se “Është superlajm, pasi Shqipëria dhe Maqedonia kanë një date zyrtare për çeljen e negociatave!”, por më pas duke folur në një bashkëbisedim me të rinj në Novi Sad ajo e moderoi deklaratën duke thënë:
“Ne nuk jemi të lumtur për vendimin e shtyrjes së negociatave, por është një vendim i mirë duke patur parasysh rrethanat, jo vetëm për Shqipërinë por për gjithë rajonin. Në hapin tjetër, është e rëndësishme të instutcionalizohet roli i shoqërisë civile dhe të krijojmë një lidhje më të ngushtë ndër-rajonale”.
