Biblioteka Kombëtare në Tiranë, ka shpallur sot gjendjen e jashtëzakonshme, pasi shiu që ra tre ditë më parë, duket se i ka dëmtuar një sasi të madhe librash dhe revistash të cilat janë pjesë e saj. Mediat e ndryshme bën publike pamjet deri diku skandaloze, ku librat qëndronin të hapur në tavolinë për tu tharë. Mësohet se janë pikërisht 12 mijë libra të lagur nga shiu, shifër kjo në nivele alarmante.
Uji është konstatuar, në një nga sallat e saj në katet e nëndheshme të hapësirave depozituese të koleksioneve bibliotekare (libra, revista, gazeta), duke dëmtuar/lagur materialet bibliotekare të sistemuara në nivelet e ulta të sallës.
Edhe pse në fillim të vitit 2018, drejtoresha e Bibliotekës, Persida Asllani tha në një intervist të sajën, ka treguar se së shpejti do të nis rikonstruksioni i këtij ambienti, por duket se ende nuk është marrë asnjë masë. Prej shumë vitesh askush nuk ka vënë dorë për t’i siguruar ambientit më të rëndësishëm kulturor në vend, as kushtet minimale. Mjaftoi vetëm një shi i rrëmbyeshëm vere, për të shkaktuar një katastrofë me përmasa të tilla. Kjo situatë ka bërë që Biblioteka të shpallë gjendjen e jashtëzakonshme, dhe të kërkojë ndihmë urgjente nga Ministria e Kulturës.
