Një kërkesë disi e çuditshme u shpërnda dje në të gjitha shkollat e Tiranës, ku u kërkohej prindërve që të dërgonin me urgjencë në shkolla numrin personal të kartës së identitetit, adresën e e-mail, numrin e telefonit, pra të gjithë të dhënat personale. Askush në drejtoritë e shkollave nuk e dinte arsyen se pse po mblidheshin të dhënat e gjithë prindërve, thjesht ishte një urdher i ministrisë.
Partia Demokratike e quajti abuzive dhe përmes Albana Vokshit deklaroi se “formularët e gatshëm janë shpërndarë nga kryeministria me të dhënat për kartat të identitetit, numrat e telefonave, e-maileve .Partia Demokratike u bën thirrje të gjithë PRINDËRVE të refuzojnë të japin të dhënat të tyre personale, pasi, përveçse mund të keqpërdoren në kazanët zgjedhore të Rilindjes, është krejtësisht e paligjshme dhe të dhënat e tyre rrezikojnë deri sigurinë e jetës”.
Ditën e sotme ka reaguar Ministria e Arsimit, dhe është terhequr nga kërkesa që kishte për prindërit për të dorëzuar numrin personal të kartës së identitetit në shkolla.
Lexoni të plotë deklaratën e Ministrisë së Arsimit
Ministria e Arsimit, Sportit dhe Rinisë kërkon të sqarojë komunitetin e prindërve dhe publikun për sa i përket kërkesës për mbledhjen e të dhënave nga prindërit se;
MASR po krijon rrjetin e komunikimit në kohë reale me prindërit dhe mësuesit. Ky sistem do të rrisë transparencën dhe llogaridhënien e stafeve të shkollave kundrejt komunitetit të prindërve të cilët duhet të jenë sa më të përfshirë me sugjerime dhe këshilla duke qenë të informuar për çdo rezultat apo nismë.
Për ta bërë efektiv dhe të sigurt këtë proces, është parë e nevojshme nga specialistët vendosja e Numrit ID si element sigurie, për të shmangur çdo gabim raportimi të të dhënave në emër dhe mbiemër që informacioni të jetë sa më i saktë dhe të shmang dublikimet.
Ministria e Arsimit, Sportit dhe Rinisë siguron se këto të dhëna nuk kanë asnjë qëllim të ndryshëm siç interpretohet nga subjekte të caktuara politike, por kanë një dhe vetëm një qëllim, informimin e prindërve se çfarë ndodh në çdo orë mësimi në çdo shkollë të Shqipërisë.
Theksojmë edhe një herë, se të gjitha akuzat drejtuar këtij procesi janë të ulëta, në rastin më të mirë dhe dashakeqe ndaj institucioneve të dijes ku mësojnë fëmijët e shqiptarëve.
Për të shmangur spekulimin politik me këtë detaj që është vetëm teknik, Ministrja e Arsimit, Sportit dhe Rinisë znj. Nikolla ka nxjerr urdhër për heqjen e kësaj kërkese.
Do të vijojmë më ngritjen e rrjetit të bashkëqeverisjes me prindërit dhe mësuesit edhe në mungesë të elementit NID.
/Opinion.al
