Është zhvilluar sot një raund i ri negociatash politike për formimin e qeverisë së re italiane.
Kryetari i dhomës së deputetëve Roberto Fico, i emëruar nga Presidenti i Republikës si kryenegociator për arritjen e një marrëveshje qeverisëse mes Lëvizjes 5 Yje dhe Partisë Demokratike është takuar me përfaqësuesit e këtyre forcave politike.
Partia Demokratike përmes kryetarit të përkohshëm të saj Maurizio Martina ka deklaruar se kjo forcë politike është e disponueshme për këtë formë të re qeverisëse me kusht që Lëvizja 5 Yje të mbyllë dialogun me Partinë Lidhja e të konfirmojë pamundësinë e një aleance qeverisëse me qëndrën e djathtë italiane.
“Forca jonë politike bëri vlerësimet e saj pas votës së 4 marsit që për Partinë Demokratike ishte një skenar humbje. Por pas këtij fakti të ri, pra propozimit të Presidentit për një qeveri koalicioni mes 5 Yjeve e Partisë Demokratike, e pas përpjekjeve pa sukses të arritjes së koalicioneve të tjera qeverisëse, Partia Demokratike është e disonueshme të qeverisë me 5 Yjet me kusht që kjo forcë politike të ketë mbyllur dialogun me Partinë Lidhja e të konfirmoj pamundësinë e një skenari qeverisës me qëndrën e djathtë.Partia Demokratike angazhohet të bashkëpunojë me 5 Yjet pa fshehur pikëpamjet e ndryshme politike që na ndajnë”, u shpreh para gazetarëve kreu i Partisë Demokratike, Maurizio Martina.
Ndërkohë në këto momente, kryenegociatori Roberto Fico po zhvillon bisedimet me përfaqësuesit e Lëvizjes 5 Yje.
Nëse kjo forcë politike konfirmon kërkesat e Partisë Demokratike, me shumë mundësi qeveria e ardhshme italiane do të jetë një qeveri koalicioni mes PD e 5 Yjeve./OraNews
