Kjo javë në ‘Opinion’ është dominuar nga ngjarjet dhe zhvillimet e aktualitetit. Sa i përket shikueshmërisë së emisionit edhe këtë herë ‘Opinion’ duket se ka mbërthyer mbrëmjet e shqiptarëve duke shënuar disa shifra rekord sidomos mbrëmjen e të enjtes.
Por ka edhe një konstatim; teksa çdo javë tjetër temat që ishin jashtë aktualitetit renditeshin në vend të fundit si më pak të ndjekurat, këtë herë nuk ka ndodhur kjo, por dita që ka pasur me pak audiencë ka qenë ajo kur në emision flitej për temë nga kronika e zezë.
Më poshtë sjellim audiencat e plota të emisionit ‘Opinion’ për këtë javë:
Mbrëmjen të hënës (16 prill 2018) në emisionin ‘Opinion’, u fol për vrasjen e ndodhur pak ditë më parë në kryeqytet ku mbeti i vdekur 28 vjeçari Marjo Majollari. Ndërsa në pjesën e dytë u transmetua një intervistë me artisten e njohur shqiptare Ornela Vorpsi. Audienca maksimale ishte 41.0% dhe ajo mesatare 32.7%, ky ishte emisioni më pak i ndjekur gjatë kësaj jave.
Të martën në mbrëmje në emisionin ‘Opinion’ është folur për tre tema të rëndësishme nga politika në vend. Në pjesën e parë është trajtuar çështja e Tom Doshit, ndalimi i hyrjes së tij në Amerikë. Në pjesën e dytë ishte i ftuar në një intervistë themeluesi i PD Arben Imami, i cili ka folur për zhvillimet e fundit brenda PD-së dhe në pjesën e tretë është transmetuar një material për rekomandimet pozitive të Shqipërisë nga KE. Maksimumi i audiencës arriti në 47.1% ndërsa audienca mesatare ishte 33.9%
Mbrëmjen e të mërkurës (18 prill 2018) në emisionin ‘Opinion’ u trajtua një temë sociale jashtë aktualiteti, raportet dhe mënyrat se si i krijojnë marrëdhëniet dhe miqësitë djemtë dhe vajzat. Si ka evoluar mënyra e komunikimit dhe njohja mes djemve dhe vajzave shqiptare dhe të rejat që ka sjellë teknologjia. Sipas të dhënave audienca maksimale ishte 42.2% ndërsa ajo mesatare 34.2%.
Të enjte në emisionin ‘Opinion’ u fol për tre tema nga aktualiteti. Në pjesën e parë ishte në lidhje direkte nëpërmjet telefonit ish ministri i Brendshëm Saimir Tahiri, i cili është duke u hetuar aktualisht nga Prokuroria e Krimeve të Rënda për trafik drogë. Po ashtu nga të ftuarit në studio u fol edhe për deklaratat e artistes shqiptare Ornela Vorpsi ndaj kryeministrit Rama. Në pjesën e dytë u fol për kryeministrin e vendit Edi Rama, dhe 20 vitet e tij në politike: “Rama thelb apo fasadë?” Në pjesën e tretë në Opinion transmetua një intervistë e gazetares Desada Metaj me Ministrin e Jashtëm Ditmir Bushati, për rekomandimet e KE. Audienca maksimale e arriti kulmin e saj orën 23:13, duke shënuar një shikueshmëri rekord me 50.9%, ndërsa audienca mesatar ishte 34.4%.
E enjtja ka fituar audiencën më të madhe të javës. Rikthimi i Saimir Tahirit në Parlament, deklaratat e Vorpist për Ramen, jeta politike e Ramës në 20 vite dhe Rekomandimet e KE, duket se kanë marrë vëmendjen më të madhe si ngjarjet më të rëndësishme të javës edhe në ‘Opinion’./Gerta Zaimaj-opinion.al
