Një 43-vjeçar i dënuar me burgim të përjetshëm në Greqi është arrestuar nga policia në Lushnjë. Ai është Altin Dhamo, 43 vjeç, banues në lagjen “Kadri Qystri” të këtij qyteti.
Në njoftimin e policisë, bëhet me dije se; Prokuroria Pranë Gjykatës së Shkallës së Parë Lushnjë në datën 02.03.2018, ka urdhëruar ekzekutimin e vendimit penal të datës 28.02.2018 të Gjykatës së Shkallës së Parë Lushnjë e cila ka caktuar masën e sigurisë “Arrest me burg” për këtë shtetas.
Kjo masë sigurie, sqaron policia, është vendosur për llogari të Gjykatës së Përbërë të Betuar Trikalon, Greqi, e cila me vendim të formës së prerë e ka deklaruar fajtor shtetasin Altin Dhamo për veprat penale “Vrasje me dashje”, Vjedhje me dhunë” e kryer në bashkëpunim, e mbetur në tentativë, “Vjedhje e kryer në bashkepunim”, “Armbajtje pa leje”, dhe e ka dënuar atë me burgim të përjeteshëm”.
