Departamenti Amerikan i Shtetit i ka ndaluar ish-prokurorit të Përgjithshëm Adriatik Llalla dhe familjes së tij hyrjen në Shtetet e Bashkuara, me pretendimin se është i përfshirë në një aferë korrupsioni.
Ligjet amerikane parashikojnë që në rastet kur ka informacione të besueshme se zyrtarë të huaj përfshihen në afera madhore korrupsioni, ose në shkelje të rënda të të drejtave të njeriut, këtyre individëve dhe familjes së tyre të afërt u ndalohet hyrja në SHBA.
Adriatik Llalla shërbeu si Prokuror i Përgjithshëm i Shqipërisë nga dhjetori 2012 deri në dhjetor 2017.
Të enjten, përmes një e-maili, ai ka mohuar përfshirjen e tij në një aferë korrupsioni, duke iu përgjigjur disa pyetjeve me shkrim. Ish-kryeprokurori ka theksuar se asnjëherë nuk ka qenë nën hetim nga autoritetet shqiptare. Llalla ka theksuar se ndalimi i tij dhe familjes nga SHBA-të është produkt i mosmarrëveshjeve me Donald Lu, ambasador i SHBA-së në Shqipëri.
Llalla sqaron se nuk është në dijeni të provave për korrupsion që kanë SHBA-të ndaj tij, por ai fajësoi Donald Lu-në për këtë çështje, duke theksuar se ky i fundit ka ‘keqinformuar dhe keqinformon qëllimisht’.
“Ai më ka ofenduar mua dhe familjen time dhe të gjithë trupën gjyqësore dhe të prokurorëve, duke na trajtuar si kriminelë, duke na denigruar publikisht dhe personalisht” ka thënë Adriatik Llalla për WSJ.
Llalla dhe Lu janë përballur për çështjen e Reformës Gjyqësore, një shqetësim kryesor në përpjekjet e Shqipërisë për t’u bashkuar me Bashkimin Europian. Reforma u miratua në vitin 2016, por zbatimi i saj ka qenë i zymtë, si dhe me tymuese të vendosura në parlament pas votimit për emërimin e një pasardhësi të përkohshëm të Llallës.
Lu akuzoi Llallën në fillim të vitit 2017 se doli kundër refomës, por ky i fundit i quajti komentet një përpjekje për të manipuluar opinionin publik. Kërcënimi u përshkallëzua, Ambasada e SHBA në atë kohë revokoi vizat e udhëtimit të disa gjyqtarëve dhe prokurorëve shqiptarë pa lëshuar emra, duke iu referuar “abuzimit flagrant të një vizë zyrtare” nga një prokuror i lartë dhe bashkëshorten e tij.
Të premten, Zëri i Amerikës, kërkoi nga Prokuroria e Përgjithshme një qëndrim “nëse do të ndërmerret apo jo ndonjë veprim ndaj ish Kryeprokurorit Adriatik Llalla, pas vendimit të Departamentit amerikan të Shtetit për t’i ndaluar atij hyrjen në Shtetet e Bashkuara për shkak të përfshirjes në raste të mëdha korrupsioni”
“Prokuroria e Përgjithshme e Republikës së Shqipërisë i jep përparësi integritetit moral dhe profesional të zyrtarëve. Populli shqiptar pret dhe meriton që zyrtarët të punojnë me ndershmëri dhe integritet në të mirë të interesit publik”, thuhet në përgjigjen e Prokurorisë së Përgjithshme ndërsa shton se ky institucion “u jep mbështetjen e plotë të gjithë prokurorve që punojnë me përkushtim, dinjitet dhe integritet” e se “gjithashtu mbështet qëndrimin për ndëshkimin e cilitdo që cënon parimet e Shtetit të së Drejtës”.
Rasti i zotit Llalla ishte i pari i një zyrtari të lartë shqiptar ndaj të cilit Shtetet e Bashkuara marrin sanksione të tilla. Javën e shkuar ish kryeprokurori u tërhoq nga e drejta për të qenë gjykatës në Apel duke prefruar të mbetet jashtë sistemit të Drejtësisë. Një vendim i cili solli sot dhe ndërprerjen e procesit të rivlerësimit të nisur ndaj tij.
Duke komentuar lëvizjen e pak ditëve më parë të zotit Llalla, ambasadori amerikan në Tiranë Donald Lu u shpreh se “tërheqja nuk i shfajëson këta ish zyrtarë nga përgjegjësitë e mundshme penale për korrupsion apo shpërdorim detyre. Ata që kanë frikë nga Vetting-u, duhet të kenë frikë dhe nga hetimet e pashmangshme penale”.
