Vaji i kokosit është i mirë për çdo gjë, gati gati si ata nxënësit në shkollë të mesme që frekuentonin kurse, ishin të shkëlqyer në shkollë, kishin edhe të dashur, dhe shumë shokë. Ushqimi më trendi është i shkëlyer për flokët, plagët, lëkurën, për të gatuar e çdo gjë tjetër që ju vjen në mendje. Nëse produktet natyrale të bukurisë do të organizonin një mbrëmje mature, vaji i kokosit do të ishte mbretëresha e mbrëmjes.
Megjithatë asgjë nuk është perfekte, as vaji i kokosit. Ka persona që betohen në emër të vajit të kokosit kur vjen puna te kurimi i akneve, por disa të tjerë pranojnë që vaji i kokosit vetëm i ka përkeqësuar.
Dermatologët thonë se vaji i kokosit nuk është studiuar specifikisht për efektin që ka te aknet, por në përmbajtjen e tij ka elementë të cilët janë anti inflamatorë, anti mikrob dhe luftojnë shumë baktere. Është shumë hidratues gjë që është themeltare për trajtimin e akneve. Yndyra e vajit të kokosit (edhe pse yndyra është një ndër faktorët kryesorë të krijimit të akneve) e ushqen lëkurën dhe nuk krijon shenja kur përthahen aknet.
Por nga ana tjetër, aknet krijohen edhe për shkak të bllokimit të poreve gjë që çon në infeksion më pas, dhe vaji i kokosit njihet për vetinë që ka për të mbyllur poret.
Dermatologët kanë arritur në përfundimin që vaji i kokosit është shumë i mirë për lëkurën nëse përdoret si heqës grimi ose si pjesë e rutinës së pastrimit të fytyrës. Pas kësaj, sigurohuni që të fshini me një pecetë tjetër yndyrën e mbetur në lëkurë. Kështu ju merrni të gjitha përfitimet nga vaji i kokosit dhe nga ana tjetër nuk rrezikoni për një shpërthim të akneve nga bllokimi i poreve./Opinion.al
