Me siguri e dini që rrezet e diellit ju dëmtojnë lëkurën dhe (shpresojmë) kujdeseni për të duke përdorur krem mbrojtës kundër rrezeve të diellit edhe nëse nuk jeni në plazh. Ajo që mbase nuk dini është që rrezet ultra violet që vijnë nga dielli nuk janë të vetmet që e dëmtojnë lëkurën tuaj. Përkrah rrezeve UV, shtoni në listë edhe rrezet blu.
Njihen ndryshe si rrezet HEV (High Energy Visible Light) që do të thotë dritë me energji të lartë të dukshme. Këto rreze emetohen nga celularët, tabletat apo kompjuterat. Është i frikshëm fakti që edhe drita e telefonit tuaj apo kompjuterit ju dëmton lëkurën, duke pasur parasysh se sa kohë kalojmë ne përpara ekraneve të vegjël, e ndonjëherë na zë edhe gjumi me celular në dorë.
Zbulimet e fundit sugjerojnë se ekspozimi ndaj rrezeve blu me kohën do të shfaqë shenja të plakjes, do të përkeqësojë rrudhat, dhe do të krijojë vija e njolla në lëkurë. Ekspertët shpjegojnë se drita blu e tepruar përshpejton oksidimin, gjë që nxit inflamacionin dhe dëmton shtresën e parë të qelizave. Për shkak të kësaj të fundit lëkura është më e prirur nga plakja, humbja e elasticitetit dhe njollat.
Fatmirësisht, aty ku ka probleme lëkure ka edhe zgjidhje. Kompanitë kozmetike kanë prodhuar kremëra mbrojtës edhe nga rrezet blu. Këto kremra kanë në përmbajtjen e tyre antioksidantë që nuk lejojnë penetrimin e rrezeve blu. Oksidet e hekurit dhe vitamina C e ndihmojnë gjithashtu lëkurën të ruajë ngjyrën e njëtrajtshme, pa krijuar njolla. Konsultohuni në dyqanet kozmetike ose në farmaci për kremin e përshtatshëm që ju mbron nga rrezet UV dhe HEV./Opinion.al
