Catania – “Gomonet përdoreshin për të transportuar marijuanë nga Shqipëria drejt Katanias!”
Kështu e nis artikullin për mbylljen e hetimeve të dosjes “Habilaj” portali italian “catania.livesicilia.it”. Në këtë artikull shkruhet se çështja që ka trazuar politikën shqiptare është mbyllur nga Prokuroria e Katanias dhe të akuzuarit pritet të dalin përpara Gjykatës.
“ Një tregti e paligjshme e narkotikëve që ka hedhur hije përfshirë edhe politike, për aftësinë e Institucioneve shqiptare në lidhje me parandalimin e trafikut ndërkombëtar të drogës. Prokuroia e Katanias ka gjetur lidhjet familjare mes kreut të bandës Moisi Habilaj dhe ish- ministrit të Brendshëm Saimir Tahiri. Investigimi i Prokurorisë së Katanias i cili i dha rezultatet në një aksion blitz tetorin e kaluar, ka krijuar një sërë polemikash me nivel politik në Shqipëri. Kjo edhe për shkak se disa vite më parë, një ish polic bëri akuza të rënda ndaj mbrojtes që qeveria i jepte trafikantëve të drogës nga institucionet e korruptuara.
Çështja “Rosa dei Venti”, e drejtuar nga prokurori Andrea Bonomo tashmë është mbyllur. Përfundimet e organit të akuzës i janë përcjellë gjykatës për Angelo Busacca, Moisi Habilaj, Fatmir Minaj, Gianluca Passavanti, Antonino Riela, Vincenzo Spampinato, Maridian Salaj, Fabio Spampinato, Carmelo Sandro Bertolini, Enrico Maria Giaquinta, William Patanè, Massimiliano Maria Brundo, Rosario Giuliano, Antonio Greco dhe Giuseppe Greco. Gjatë kësaj periudhe, disa nga të akuzuarit i janë nënshtruar pyetjeve para prokurorit.” – shkruhet në artikull.
Dosja “Habilaj” prej më shumë se 3 muajsh është kthyer në debatin më të nxehtë politik në vend. Së fundmi, ekstradimi i të vetmit pjestar të bandës, kapur në Shqipëri, Nezar Seitaj (i cili dyshohet të jetë financieri i bandës) është bërë shkak i një situate të tensionuar në Parlament ditën e sotme. Opozita e cilëson si mbrojtje ndaj Tahirit largimin e Seitaj drejt Italisë, ndërsa mazhoranca refuzon kategorikisht të flasë për këtë çështje në Parlament.
http://catania.livesicilia.it/2018/02/01/traffico-droga-dallalbania-rosa-dei-venti-inchiesta-chiusa_447769/
