Emilioano Boçi, i vrarë mbrëmjen e sotme nuk është emër i panjohur për policinë. Ai ka qenë pjesë e një shkëmbimi zjarri në vitin 2010, ku dhe ka mbetur i plagosur.
Në shkëmbim zjarri janë përfshirë edhe tre persona të tjerë, të cilët bashkë me Bocin fillimisht janë konfliktuar mes tyre në një lokal pranë Tiranës së Re, për motive që policia nuk ka mundur t’i zbardhë asokohe.
Pas sherrit në lokal, Boci i ka telefonuar personit me të cilin ishte konfliktuar dhe i ka lënë një takim në zonën e Selitës.
A.T., i cili gjithashtu ka mbetur i plagosur në këtë shkëmbi zjarri ka shkuar në vendin e takimit të caktuar nga Boci bashkë me një shokun e tij. Emiliano Boci, asokohe 24 vjeç ka qenë duke e pritur përpara makinës, i ulur në gjunjë dhe me dorën e djathtë pas shpine.
A.T i ka kërkuar disa herë të tregojë duart, por pas refuzimit të Bocit, ai ka qëlluar duke e plagosur në gjoks. Menjëherë është kundërpërgjigjur Boci, ndërsa shoku i tij ka qëlluar në ajër me pistoletë.
Boci ka plagosur A.T, dhe të dy janë nisur drejt spitalit me makina të ndryshme. Gjatë rrugës ata janë shkëmbyer mes tyre dhe Boci ka qëlluar edhe dy herë të tjera në drejtim të automjetit ku ndodhej A.T, i plagosur.
Pas ngjarjes policia ka arrestuar Bocin, shtetasin A.T dhe dy shokët e tyre, të cilët janë përfshirë në hetime dhe më pas janë gjykuar në Gjykatën e Tiranës. Emiliano Boci asokohe është dënuar me 2 vjet burg për akuzën e vrasjes në kushtet e tronditjes së fortë psikike, mbetur në tentativë.
