Në Ministrinë e Mbrojtjes të premten u zhvillua një ceremoni falenderimi dhe mirënjohjeje për Forcat e Armatosura të Shqipërisë, me pjesëmarrjen edhe të kryeministrit Edi Rama.
Mësohet se kjo ceremoni u zhvillua edhe në kuadrin e 105 Vjetorit të Themelimit të Ushtrisë Shqiptare.
Ministrja Olta Xhaçka i shprehu mirënjohjen Forcave të Armatosura, të cilat kontribuan maksimalisht për përballimin e përmbytjeve javët e fundit në vendin tonë.
Fjalën e ka marrë kryeministri Edi Rama, i cili tha se për shkak të përmbytjeve nuk u arrit të përkujtohej siç FA-të e meritonin, ditën e themelimit të tyre.
“Këto ditë e gjithë Shqipëria e ndoqni me shqetësim dhe e pa me adminirim, ushtrinë shqiptare, në përpkjet për t’u qënë pranë të gjitha motrave dhe vëllezërve të prekur nga përmbytjet, ashtu siç mundi të shohë fare pak nga aktet e FA gjatë angazhimit. Në ato ditë të operacionit, një koleg juaji më tha se këto janë ato ditë kur uji nuk është ën anën tënde dhe e ke përballë në front”,-u shpreh Rama.
Ai tha se FA-të rrezikuan jetën për të mbrojtur jetët njerëzore për të përmbushur misionin në mënyrën më të plotë.
Më tej, Rama theksoi se do të ishte e padrejtë që duke folur me admirim për FA-të, të harroheshin simotrat apo sivëllezërit e tyre, siç janë Policia, OSHEE dhe Mjekësia, që bënë pjesën e tyre ndaj njerëzve dhe ndaj shtetit.
“Mirënjohje dhe respekt për të gjithë gjeneralët, oficerët, nënoficerët dhe Shefin e Shtabit që ka qëndruar në krye të detyrës me kolegët e Shtabit duke i dhënë kuptim faktit të thjeshtë se në Ushtrinë shqiptare funksion parimi : Një për të gjithë dhe të gjithë për një”,- tha kryeministri.
Ndërkaq, Rama falenderoi edhe ministren e Mbrojtjes për përkushtimin dhe përballimin e situatës, si dhe vendeve të rajonit që pa u kërkuar askush, u përfshinë në përpjekjen e solidaritetit për vendin tonë.
“Kosova nuk diskutohet, po ashtu Serbia, Mali i Zi, Turqia, Italia, po ashtu SHBA, që përmes ambasadorit të tyre iu gjendën pranë FA-së dhe popullit shqiptar “,- u shpreh Edi Rama.
Megjithatë, ceremonia e sotme u zhvillua në kushtet kur banorët e përmbytur ende nuk janë kthyer në banesat e tyre dhe bizneset dhe fermat e tyre janë shkatërruar.
