Të tjera detaje dalin në dritë nga krimi makabër në Gjirokastër, që tronditi dje mbarë opinionin publik. Aposto Kosta kishte hyrë në banesën e kushëririt të tij të parë, me një kallashnikov, ndërsa ka hapur zjarr duke lënë të vdekur Aleko Kosta 66-vjeç dhe Afërdita Kosta 49-vjeç.
Nga të dhënat e grupit hetimor të çështjes ka dyshime se Aleko Kosta kishte hyrë në oborrin e banesës së çiftit me një armë. Fill pas këtij veprimi, ai është futur brenda, ku ka hapur zjarr ndaj gruas së kushëririt të tij, e cila në ato momente ndodhej në aneksin e kuzhinës në katin e parë.
Pasi kishte qëlluar Afërdita Kostën, autori është ngjitur për në katin e dytë, ku është përballur me kushëririn e tij, ndaj të cilit ka shkrehur armën. Në banesën e krimit gjendej edhe djali 20 vjeçar nga martesa e parë e Afërdita Kostës, i cili është ngritur i alarmuar nga zhurmat dhe është fshehur. Vetëm pak minuta më vonë ai ka dalë për të parë se çfarë kishte ndodhur, ndërsa është përballur me një skena makrabre, ku ka parë të lyerë në gjak njerkun dhe nënën e tij. Ndërkohë, në kushtet e tronditjes së rëndë, autori i dyshuar, Kosta, ka shkuar në shtëpi dhe me armën e krimit ka qëlluar me plumb në gojë veten, duke u plagosur, por ndodhet jashtë rrezikut për jetën.
Pas vendimit që gjykata e Gjirokastrës kishte dhënë në favor të kushëririt të tij Aleko Kosta, për një hapësirë toke prej 4 m katrorë, në të cilin ky i fundit kishte ndërtuar shkallët, konflikti mes tyre ishte thelluar akoma më shumë. Autori pak pas vendimit ishte shprehur se kësaj çështje do t’i shkonte deri në fund dhe se ‘do ia ndreqte qefin’ kushëririt të tij, por askush nuk kishte menduar se ai kishte planifikuar të vriste çiftin. Nga të dhënat që vijnë nga grupi hetimor, jashtë banesës ku ndodhi krimi është gjetur edhe një granatë dore e pashpërthyer, (për shkak të mungesës së ndezësit), ndërsa brenda 15 gëzhoja arme.
