Dosja e Gjykatës së Katanias në të cilën trafikantë droge italo-shqiptarë përmendin dhe ish-ministrin Saimir Tahiri, ka tronditur jo pak politikën shqiptare, por edhe opinionin publik në vend.
Kreu i Partisë Demokratike, pak minuta më parë, përmes një shënimi në Facebook, i ka kërkuar kryeministrit Edi Rama të largohet dhe të japë llogari para drejtësisë.
Basha shkruan se shqiptarët janë ballafaquar me disa fakte të thjeshta dhe të kuptueshme nga të gjithë se antimafia italiane ka prova ligjore të trafikut të drogës dhe armëve të kryer nga një bandë kriminelësh shqiptarë të ndihmuar direkt nga Ministri i Brendshëm, Saimir Tahiri.
Ai kujton se të njëjtën akuzë ka bërë edhe oficeri i policisë Dritan Zagani me fakte dhe prova që prej dy vitesh.
Sipas tij, përballë këtyre fakteve, kryeministri Rama sillet si i pafytyrë dhe gënjeshtar patologjik, i bindur se do ja hedhë duke mohuar çdo gjë.
“Dosja Habilaj-Tahiri e drejtësisë italiane ju tregon shqiptarëve dhe mbarë Europës, sesi krahu i djathtë i Edi Ramës është kapur në flagrancë në trafik droge, se si krejt shteti është kalbëzuar dhe është vënë në shërbim të trafikantëve”,- shkruan Basha.
Kryedemokrati thekson se në kohën që ky skandal ka tronditur nga themelet Rilindjen, ka provuar kauzat e drejta të Opozitës dhe e ka nxjerrë Edi Ramen lakuriq para mbarë opinionit, ky vetë nuk ka kurajon të mbajë as më të voglën përgjegjësi, por vazhdon avazin e vjetër se fajin e ka opozita.
Për Bashën, shqiptarët që në shumicë mezi mbyllin muajin, shohin sesi trafikanti blen 9 mijë euro varësen për familjarët e ministrit të tij, se si Tahiri, kampioni i Ramës, merr 30 mijë euro për një ngarkesë, dhe se ka bërë të paktën 5 milionë euro në muaj.
“Edi Rama as nuk turpërohet, as nuk përgjigjet, as nuk mban përgjegjësi për një arsye të thjeshtë dhe të kuptueshme: Sepse është ai pas Saimir Tahirit, është ai pas çdo habili, është ai pas çdo shefi policie që ka ngarkuar thasët me drogë”, -shkruan kreu i PD-së.
Më tej, Basha thekson se Rama ka përfituar qindra milionë euro që erdhën nga droga dhe kanabizimi i vendit për të blerë votat dhe për të mbajtur pushtetin.
“Shqiptarët e dinë tashmë, opinioni publik, dhe media ende e pakapur e ka kuptuar. Ndërkombëtarët po ashtu: as krimi, as trafiku i drogës, as përfshirja në to dhe as ndarja e pushtetit me kupolën mafioze, nuk mund të bëheshin pa dijeninë, lejen dhe mbrojtjen e Ramës. Ai është faktuar sot si peshku më i madh. Ndaj Rama duhet të largohet. Ai duhet të japë llogari para drejtësisë”, thekson kreu i PD-së, Lulzim Basha në Facebook.
Grupi i trafikantëve të arrestuar nga policia italiane për 3.5 tonë hashash ishte vënë prej kohësh nën pergjim. Moisi Habilaj, bashkëpunëtorët e tij shqiptarë dhe italianë kanë tashmë një dosje prej 416 faqesh me fakte dhe biseda të përgjuara, ku ata përmendin emra dhe para dhe që është baza e vendimit të Gjykatës së Katanias për burgosjen e tyre.
Pjesë e kësaj dosje është një përgjim i datës 16 dhjetor të vitit 2013 i një bisede mes Moisi Habilajt dhe Sabaudin Çelajt, kur ata sipas vlerësimit të prokurorëve dhe gjykatësve italianë, përmendin Ministrin e Brendshëm të asaj kohe, Saimir Tahiri.
