Askush nuk kishte për ta besuar në jetën reale, por ama në filmin e ri të regjisorit shqiptar Jetmir Pjetërnikaj, “FLOORLESS” Xhilaga është në rolin e një banakiereje që bllokohet në ashensor.
Shtatzënë në muajin e saj të 6-të, Çiljeta (në film) fillon të përjetojë ankth dhe frikë kur një psikopat ndër 5 persona të tjerë rastësorë të bllokuar në ashensor, fillon të “terrorizojë” të pranishmit duke nxjerrë në pah të vërteta tronditëse të tyre.
Cilësuar si një thriller psikologjik i pazakontë, “FLOORLESS” premiera e të cilit është më 19 tetor në Cineplexx mblodhi një kastë aktorësh dhe figurash të njohura italiane. Ndër ta si një gjetje është konsideruar prania e Siria De Fazio, ish-konkurentes së “Grande Fratello 9” dhe një nga personat më kontroversiale në televizionet italiane për biseksualitetin e saj dhe dashurinë e madhe që ajo përjetoi me vajzën e Ornella Mutit, Naike Rivelli.
Aktorët e tjerë si Stefano Scherini, Giuseppe Di Coste apo dhe Santo Cuzzuto i kanë dhënë filmit një ajër ndryshe dhe shumë origjinalitet. Jetmir Pjetërnikaj (Xheti) mban rolin kryesor në këtë film ndërsa Bjordi Mezini luan rolin e një fëmije autik, ku sipas kritikave, thuhet se e ka “qarë” atë.
