I ftuar në televizionin news24 gazetari i kronikës së zezë Artan Hoxha ka bërë disa deklarata të forta për operacionet e fundit të Policisë së Shtetit. Hoxha tha se operacioni në Elbasan nuk duhet bërë në atë formë pasi ky qytet është një nyje strategjike e trafikimit të heroinës afgane. Për këtë arsye Hoxha tha se Shqipëria ndodhet në të gjithë raportet e trafikimit të BE, Interpol, Europol dhe DASH. Sipas gazetarit është një linjë e rëndësishme e trafikut të heroinës që vjen nga Afganistani nëpërmjet Turqisë dhe ka si qëllim tregun italian dhe atë të BE. Më tej Hoxha deklaroi se beteja në Elbasan zhvillohet mes bandave për të marrë në dorë linjën e trafikut të drogave të forta.
“Operacione të tilla, që duken më shumë si sezone mode ‘vjeshtë-dimër’ dhe një tjetër që ishte para ‘summer’, më ngjajnë me ato të viteve ‘98 apo’ 99, të cilat që në emërtim kanë diçka që çedon. Sa i përket operacionit masiv në Elbasan, të gjitha kapacitetet policore u vunë në lëvizje për të bërë krehjen e gjithë qytetit, por mendoj që s’ka nevojë për këto krehje që bëheshin në ‘97 kur bandat ishin rrugëve. Atëherë po, kishte nevojë, sot jemi në një stad tjetër. Kemi folur për një lloj tjetër natyre krimi. Kemi thënë që Elbasani është nyje strategjike e degëzimit në rrugën ballkanike të heroinës afgane dhe Shqipëria është në çdo raport të BE, Interpol, Europol dhe DASH një linjë e rëndësishme e trafikut të heroinës që vjen nga Afganistani nëpërmjet Turqisë dhe ka si qëllim tregun italian dhe atë të BE. Beteja që zhvillohet në Elbasan zhvillohet për të marrë në dorë linjën e trafikut të drogave të forta. Nëse policia lufton kanabisin në territorin tonë këtu flasim për një tjetër nivel krimi”,- tha gazetari Hoxha. /Opinion.al
