Një 25-vjeçar nga Fieri është arrestuar, pasi një ditë më parë ka hedhur drejt selisë së Këshillit të Ministrave një bombë molotov.
Ardian Peshtanaku është prangosur nga Garda dhe më pas iu dorëzua policisë. I pyetur se cili ishte motivimi i veprimit të tij, Peshtanaku është shprehur se hodhi shishen e benzinës në drejtim të Kryeministrisë, pasi është i mërzitur me shtetin që nuk i zgjidh problemet.
“E kreva pasi shteti nuk më zgjidh hallet”, është shprehur përpara policisë 25-vjeçari.
Ngjarja ka ndodhur mesditën e 24 Korrikut në Bulevardin Dëshmorët e Kombit, ndërsa mësohet se nuk ka të lënduar, përveç dëmeve materiale. Ai akuzohet për shkatërrim prone me dashje.
Oficerët e komisariatit Nr. 1 kanë ngritur akuzë ndaj të riut për shkatërrim prone, ndërsa sipas Kodit Penal ai rrezikon dënim me gjobë deri në tre vite burgim.
Njoftimi i policisë
Më datë 24.07.2017, u arrestua në flagrancë shtetasi A. P. 25 vjeç, banues në Fier, sepse në orën 13:30, në bulevardin “Dëshmorët e Kombit”, përpara Kryeministrisë, ka hedhur një shishe me lëngë ndezëse, e cila ka shpërthyer po pa shkaktuar probleme në njerëz. Neni 154 i kodit penal.
