Policia e Vlorës ka dhënë detaje për zhdukjen e biznesmenit 52-vjeçar dhe ndihmësit të tij 28-vjeçar. Sipas Policisë, biznesmeni nga Vlora Adriano Jaho dhe ndihmësi i tij Ariseld Maze kishin dalë nga Vlora për në bregdetin e Durrësit, për të provuar skafin në det, por kanë humbur kontaktet me familjarët që prej datës 4 korrik. Sipas kallëzimit të familjarëve ata janë larguar nga Vlora në drejtim të Durrësit në datë 3 korrik për të marrë një skaf të cilin e kishin ankoruar në Durrës.
Njoftimi i policisë:
Më datë 05.07.2017, në Komisariatin e Policisë Vlorë, janë paraqitur familjarët e dy shtetasve të mëposhtëm:
A.J., 52 vjeç, banues në Vlorë.
A.M., 28 vjeç, banues në Vlorë.
Sipas kallëzimit të bërë nga familjarët e tyre, ata kanë deklaruar se këta dy shtetas janë larguar nga Vlora më datë 03.07.2017, rreth orës 10:30, në drejtim të qytetit të Durrësit me qëllim për të marrë një mjet lundrues detar tip Skaf, të cilin e kanë patur të ankoruar në Durres dhe që prej asaj dite nuk janë kthyer më në banesë (Vlorë).
Policia ka bërë shpalljen në kërkim të tyre si persona të humbur dhe po punohet për gjetjen e tyre.
