Në kulmin e debatit politik për të ardhmen e PD-së e cila doli e rrënuar nga zgjedhjet parlamentare dhe kërkon të zgjedhë kryetarin e ri, Kryeministri Edi Rama tregohet i hapur me qytetarët. Ai u kërkon atyre këshilla se si duhet të qeverisë në 4 vitet e ardhshme. Madje thotë se gjatë verës deri në formimin e qeverisë në shtator do të ndërmarrë një tur në bazë për të dëgjuar njerëzit se çfarë duan nga qeveria e re. A ju duket shkrimi i Ramës edhe një leksion për Lulzim Bashën i cili deklaroi se do të ngrijë veten dhe do ti hapë rrugën zgjedhjeve në parti, ndërsa tani po hesht kur stuhi kritikash janë ngritur ndaj tij?
Lexoni të plotë statusin e Ramës në facebook
CFARE DUHET TE PERMIRESOJME?
Po e përsëris që fitorja i takon Shqipërisë dhe njerëzve të zakonshëm të saj, ndërsa e imja, e jona si të zgjedhur për të udhëhequr vendin, është vetëm barra e shumëfishuar e përgjegjësisë qeverisëse.
Na duhet një reflektim i thellë brenda vetes, për të kuptuar me sa më shumë vërtetësi, çfarë duhet të korrigjojmë e përmirësojmë tek vetja, tek sjellja e puna e secilit prej nesh dhe e forcës sonë të madhe e të suksesshme, por edhe me jo pak të meta, Partisë Socialiste.
Çfarë duhet të korrigjojmë në përmbajtjen e në stilin e qeverisjes dhe si duhet e mund ta përmirësojmë, kulturën tonë qeverisëse, cilësinë e skuadrës që qeveris, në legjislativ e në ekzekutiv, bilancin qeverisës në çdo sektor?
Dhe më e rëndësishmja, si ta bëjmë këtë reflektim sa më gjithëpërfshirës, duke mos folur e dëgjuar vetëm mes njëri-tjetrit, po duke dëgjuar edhe të tjerët, njerëzit e zakonshëm të këtij vendi, sa më shumë prej tyre, qofshin ata që na kanë votuar qofshin ata që nuk na kanë votuar?
Po përgatitemi që në këtë fazë tranzitore deri në krijimin e qeverisë së re, të bëjmë një proces dëgjimor në të gjithë Shqipërinë, me disa nivele apo rrathë, brenda partisë dhe jashtë saj.
Ju jam mirënjohës paraprakisht, për çdo sugjerim prej jush këtu në rrjetin tonë dhe për ta bërë ndoshta më të lehtë, komentin tuaj, po ju pyes:
Nëse do të ishe ti Kryeministri i Shqipërisë, cilat do të ishin tre gjërat më kryesore që do përmirësoje? Natyrisht, kushdo mund të dalë nga korniza e kësaj pyetjeje apo mund ta shpërfillë atë plotësisht, e të shkruajë atë që dëshiron.
Faleminderit
/Opinion.al
