Kryeministri Edi Rama në mitingun përmbyllës në Kavajë kërkoi votën për Partinë Socialiste, e cila tha ai, është e vetmja forcë politike që do të ndërtojë shtetin shqiptar dhe do të çojë flamurin e Skënderbeut e Ismail Qemalit në oborrin e Bashkimit Europian.
“Ne kemi bërë shumë, por gjithçka kemi bërë është në themele. Tani na duhet të vendosim nëse do të ndërtojmë më tutje shtëpinë e shtetit shqiptar, apo do të përjetojmë një tjetër prishje të themeleve të tij. Kjo s’duhet të ndodhë dhe s’ka për të ndodhur, sepse në 25 qershor Shqipëria do jetë një det kuq e zi që do të hapë një rrugë të re, drejtësi të re e administratë për qytetarët”, deklaroi Kryeministri.
Në Kavajë, siguroi kryeministri Rama, duke u bashkuar të majtë e të djathtë e duke vënë Shqipërinë, flamurin kuq e zi mbi partitë e flamujt e tyre, pas katër vitesh do të shikoni një transformim të madh, shumë më tepër se ç’është bërë në këto 44 muaj.
“Ne jemi në këtë betejë sepse besojmë se Shqipëria mund të bëhet pavarësisht se ka ende shumë për të bërë dhe ajo që kemi bërë në çdo sektor nuk mjafton, por u kemi dhënë të gjithëve provën e mjaftueshme se jemi e vetmja forcë në gjendje të bëjmë shtet me punë e mirëqenie”, shtoi ai.
Rama tha se askush nuk do të largohet në 25 qershor nga rruga jonë e nisur për të bërë një Shqipëri më të fortë pa e fituar betejën e reformave, rritjes së ekonomisë mbi 5 %, pagave e pensioneve.
