Interistë, napolitanë, milanistë, romanistë…
Në Itali dje festuan thuajse të gjithë. Kombëtarja e tyre nuk është se u shpall kampione bote, por Juventusi humbi në finalen e Ligës së Kampionëve. Veçanërisht në Napoli, aty ku sulmuesi Gonzalo Higuain konsiderohet edhe sot tradhtar pas kalimit te “Zonja e vjetër”, u gëzuan tejmase.
A është kjo e turpshme? Po, por kështu e kanë tifozët, përndryshe ç’kuptim do të kishte ekzistenca e tyre? Ata janë veshja më e bukur e futbollit, kështu që le t’i pranojmë ashtu siç janë.
Problem është kur sulmohet pikërisht një njeri i vetëm, në këtë rast “El Pipita”. Ish-lojtari i Real Madridit, tashmë me fanellën bardhezi, është “akuzuar” si dështak finalesh, me klubet dhe me kombëtaren, kështu që për të mbrojtur “nderin” e tij ka menduar pikërisht i vëllai, Nicolas, i cili është edhe agjenti i 29-vjeçarit.
“Përgëzime Juventusit për sezonin e madh që ka bërë! Më të mirët luajnë në finale, ndërkohë që njerëzit mediokër festojnë humbjet e të tjerëve. Përqafime të gjithëve!” – ka shkruar sot ai.
Kështu, tifozët mësuan se Higuain e ka një engjëll mbrojtës.
