Ambasadorët e BE, SHBA dhe OSBE u kanë kërkuar kryetarëve të partive të vogla të hyjnë në zgjedhje pa PD-në. Në përfundim të takimit të Lu, Vlahutin dhe Borchardt me partitë e vogla kanë folur Mesila Doda si përfaqësuese e PDIU dhe Nard Ndoka i PDK-së.
Doda doli 10 minuta përpara përfundimit të takimit deklaroi se kishte patur debate me ambasadorin Borchardt.
“Anëtarët e opozitës ngritën shqetësimet e tyre dhe më pas unë pata një bisedë jo shumë miqësore me ambasadorin e OSBE, i cili ka deklaruar se mos pjesëmarrja e opozitës nuk do të jetë një problem, por do të jetë një fjali në raportin e OSBE/ODIHR, ndërsa ndryshimi i Kodit dhe kërkesa për të dhënë më shumë transparencë, administrim dhe numërim i të gjitha partive parlamentare në zgjedhje, ky po do të ishte një problem shumë i madh dhe ODIHR këtë nuk do ta lejonte”, u shpreh Doda.
Më tej ajo komentoi: “Kinezërira të tilla mendoj se nuk e ndihmojnë procesin dhe na përjashtojnë edhe ne të tjerëve nga ky proces. Ose të gjithë palët do të jenë kontrollues të sistemit, ose këta zotërinj që marrin rrogën këtu në Shqipëri do të duhet të kuptojnë shumë mirë se ky vend nuk mund të kthehet dot më diktaturë dhe të mos punojnë në vendosjen e autoritarizmit dhe diktaturës në këtë vend. Këtë nuk do ta lejojmë në asnjë mënyrë”.
Ndërsa Nard Ndoka ka zbuluar akoma më shumë detaje nga ky takim.
Sipas tij, Lu u ka thënë se zgjedhjet janë legjitime pa PD. “I shpreha ambasadorit Lu që në kohën e komunizmit kemi votuar 99.99% por kanë qenë të ligjshme në një sistem diktatorial”, tha Nard Ndoka.
“I thashë ambasadorit të OSBE që ti je problemi kryesor pasi ishe ti që një vit më parë që the se për votimin elektronik nuk ka kohë, ndërkohë që tani thuhet se ka kohë”, vijoi më tej Nard Ndoka.
Sipas tij gjatë takimit nuk kishte një unifikim të qëndrimeve mes SHBA-së dhe BE-së.
“Kishte një draft në tryezë që fliste edhe për zgjedhjen e Presidentit megjithëse ky tani është fakt i kryer. Ambasadori Lu thoshte se Presidenti nuk është zgjedhur akoma”, sqaroi Ndoka.
/Opinion.al
