Nga Desada Metaj
Ndërsa politika dhe publiku janë gjithë sy e veshë për të ardhmen e negociatave për zgjidhjen e krizës, afatet ligjore duket se ushtrojnë presion mbi palët që kanë në dispozicion vetëm 3 ditë. Sipas Kodit Zgjedhor partitë politike duhet të regjistrohen në KQZ 70 ditë përpara ditës së zgjedhjeve.
Pra, data 9 prill është afati i fundit, por meqë është e diel shtyhet për të hënën, në datën 10, që shënon dhe limitin ligjor për regjistrimin.
Pas datës 10 çdo parti politike që nuk regjistrohet humbet automatikisht të drejtën për të garuar në zgjedhje. Pra PD, PS apo dhe LSI kanë vetëm 3 ditë afat për të gjetur një marrëveshje, në të kundërt sikundër ka paralajmëruar koalicioni i djathtë nuk do të regjistrohet dhe nuk do të marë pjesë në zgjedhje. Vendim që automatikisht prek dhe qëndrimin e LSI për zgjedhje.
Një tjetër afat i Prillit është dhe data 19, afati i fundit që parashikon regjistrimin e koalicioneve partiake. Deri në atë ditë situata mund të jetë e paqartë por në fund të kësaj dite do të qartësohen përfundimisht dhe dilemat për koalicionin që do të zgjedhë LSI?
Por, Prilli është i ngarkuar me afate edhe për zgjedhjen e Presidentit. Si nuk ka ndodhur asnjëherë, në një peridhë kaq të ngushtë dhe nën një presion të madh politik duhet të zgjidhet edhe Presidenti. Data 19 maj shënon dhe ditën e fundit të punës së Parlamentit përpara shpërndarjes së tij. Brenda kësaj date parashikohet dhe zgjedhja e presidentit të ri. Por duket se kjo ngjeshje e afateve fsheh dhe një “surprizë” për partitë parlamentare. Presidentin do ta votojnë deputetët e këtij parlamenti, ndërkohë që në daten 29 prill përfundon dhe afati për regjistrimin në KQZ i kandidatëve për deputetët të partive që do të marrin pjesë në zgjedhje. Pyetja që shtrohet është: A do të kenë partitë politike “të pakënaqur” që nuk do ta shohin emrin në listat e reja dhe mund të mos i binden më kryetarit të partisë? A mund të sjellë kjo një bllokim dhe një tjetër krizë, këtë herë presidenciale?
Përgjigjet duken se do të jenë dhe ato në limitet kohore pasi së pari duhet zgjidhur nëse do të kemi opozitën në zgjedhje apo jo. Kjo është hera e parë që politikës shqiptare i duhet të zgjidhë kaq probleme në kaq pak kohë. Se sa e përgjegjshme dhe efikase në zgjidhje do të jetë, mbetet ta vlerësojmë në 72 orët në vazhdim. /Opinion.al
