Sekretari amerikan i Shtetit, Rex Tillerson kërkon antarësimin sa më shpejt të Malit të Zi në NATO. Sipas agjencisë së lajmeve Reuters, Tillerson i ka dërguar një letër senatit amerikan, ku i bëhet thirrje përfaqësuesve amerikanë në NATO, të votojnë në favor të antarësimit të Malit të Zi në mbledhjen e rradhës në prill.
Në letrën që mban datën 7 mars, Tillerson shprehet se anëtarësimi i shtetit të vogël ballkanik në aleancën veri-atlantike, është në interes të Shteteve të Bashkuara dhe do t’i shërbejë përshpejtimit të procesit të integrimit të vendit në strukturat euroatlantike, të reformave demokratike, tregtisë, sigurisë dhe qëndrueshmërisë së fqinjëve të saj.
Zgjerimi i mëtejshëm i NATO-s nuk është në interes të Rusisë. Ndaj dhe vonesa e Uashingtonit për t’i hapur rrugë anëtarësimit të Malit të Zi ka vënë në dyshim vullnetin administrata e presidentit Donald Trump për t’iu kundërvënë Moskës. Gjatë fushatës elektorale, republikani Tramp sinjalizoi një epokë të re drejt përmirësimit të marrdhënieve me Rusinë.
Kërkesa e Tillersonit vjen në një moment përplasjesh mes tij dhe vendeve të aleancës veri-atlantike. Agjencia e lajmeve “Reuters” njoftoi të hënën se sekretari Tillerson mund të mos marrë pjesë në samitin e rradhës të ministrave të jashtëm të vendeve anëtare të NATO-s, pasi kishte planifikuar një vizitë në Rusi më vonë gjatë prillit.
Por të martën ndryshoi kursin dhe propozoi data të reja për këtë mbledhje, e cila ishte caktuar për më 5 dhe 6 prill në Bruksel. Mali i Zi, një ish-republikë jugosllave me popullsi prej 650 mijë banorësh, shpreson të fitojë miratimin e nevojshëm nga të 28 anëtarët e NATO-s për t’u bërë një anëtar i plotë gjatë një samiti në muajin maj.
Deri në fillim të këtij muaji, 24 anëtarë kanë dhënë aprovimin e tyre. Anëtarët e NATO-s e shohin pranimin e Malit të Zi, si një mënyrë për t’iu kundërvënë përpjekjeve të Rusisë që të zgjerojë ndikimin e saj në Ballkan.
