Kur Kryeministri nominoi Fatmir Xhafën për ministër të Brendshëm, dy persona dolën dhe denoncuan publisht se janë dënuar politikisht dhe janë dhunuar në kohën e diktaturës nga hetuesi Fatmir Xhafa. Por sot ndaj Valbona Dukës dhe Xhavit Konit ka një kundërakuzë. Është gazeta Tema ajo që ka publikuar histori të panjohura më parë. Përmes një shkrimi të gjatë, “Tema” pretendon se Duka dhe Koni kanë bërë krime pas viteve ’90, pra në kohën e demokracisë.
Ja çfare shkruan “Tema”
Xhavit Seferi ka lindur në 18 korrik 1969 në fshatin Cudhi Kamit, Krujë.
Në vitin 2003 ka ndryshuar mbiemrin nga Kani në Seferi, edhe pse në Krujë njihet edhe me mbiemrin Koni.
Në 19 shkurt 2009, Xhaviti është arrestuar në flagrancë, pasi ka shkaktuar aksident automobilistik duke plagosur dy persona, ndërkohë që dy muaj më vonë është proceduar penalisht pasi ka kërcënuar me jetë një polic rrugor gjatë një tjetri aksidenti me pasoja.
Në 20 maj 2010, Xhavit Koni është dënuar në Maqedoni nga Gjykata e Shkupit me arrest në burg për 15 vjet, pasi akuzohet për trafikim të qënieve njerëzore, si anëtar i një grupi të strukturuar kriminal.
Në 15 nëntor 2011, është shpallur në kërkim për plagosje me thikë të kushëririt të tij, Fatbardh Kani, dhe vetëm një vit më vonë, kushëriri ka marr hak duke tentuar ta vrasë me armë zjarri në një atentat në mbikalimin e autostradës së Fushë Krujës.
Valbona Maloku ka lindur në 20 shkurt 1968, gjithashtu në Fushë Krujë.
Që prej vitit 1990, Valbona, së bashku me bashkëshortin dhe dy vëllezërit, janë larguar nga Shqipëria, duke hyrë në Ambasadën gjermane.
Bashkëshorti i Valbonës është vrarë në Shqipëri në vitin 1999 nga Robert Preni, ndërkohë që hakmarrja e Valbonës mendohet të ketë ardhur vetëm 3 vjet më vonë, duke vrarë vëllain e Robertit, Antonin.
Ajo çka e bën edhe më të frikshme historinë e Valbonës, është se ajo dyshohet të ketë urdhëruar vrasjen edhe të një prej vëllezërve të saj, Arben Duka, për të cilin tani derdh lot krokodili.
Ndonëse të dhënat flasin vetë, është e qartë se personat që sot hedhin baltë mbi Fatmir Xhafajn janë njerëz që fillimisht duhet të përgjigjen para drejtësisë për vrasjet, vjedhjet dhe krimet që kanë kryer jo larg në kohë, por gjatë 20 viteve të fundit.
