Kreu i Libra-s, Ben Blushi teksa prezantonte programin e partisë u deklarua hapur pro ambasdorit Lu i i cili ditët e fundit është përfshirë në debate të ashpra me kryeprokurorin Llalla. Ai tha se po tentohet të bllokohet sërish reforma në drejtësi. “Situata në Shqipëri është shumë e pastabilizuar. Reforma në drejtësi duket sikur po bllokohet sërish. Ne e kishim thënë se ata që kanë bërë ligjin, do bëjnë gjithçka për të kapur ata që ligji i emëron. Kjo praktikë e cënon frymën e reformës në drejtësi. Shqiptarët sot për fat të mirë kanë një perceptim të drejtë për atë që po ndodh, e dinë që klasa e tyre politike po bën gjithçka për ta bllokuar reformën, ndërsa SHBA po bën gjithçka për ta zhbllokuar dhe për të ecur përpara”, tha Blushi.
Më tej, gjatë fjalës së tij, lideri i Libra-s, shtoi se “reforma në drejtësi po kthehet në amnisti për prokurorë e gjyqtarë që kur nuk duan të kalojnë vetingun dhe mund të parkojnë qetësisht në lëndinat e qeta të harresës duke u falur me gjoba që kanë vetë në të shkuarën”.
Duke perifrazuar, Manjanin, Blushi tha se një ministër pranoi se paratë e korrupsionit ndahen në qeveri dhe tërrimet mbeten për gjyqtarët. “Pyetja është a do t’u hiqen vizat atyre? A do të ketë një listë të zezë për politikanët, për ata që ndajnë çdo ditë paratë e krimit, të korrupsionit?”, u shpreh Blushi.
Sipas tij, ka një hutim sot për rolin e SHBA për reformën, ka shumë njerëz që pyesin nëse është Amerika e Trump apo Obamës ajo që do reformën në drejtësi.
“Unë them se Amerika është demokraci mbi drejtësinë. Drejtësia në Shqipëri duhet të jetë e përjetshme, zgjedhjet dhe qeveritë janë të përkohshme. Këtë mbrojnë SHBA këtë duhet të mbrojë edhe Shqipëria. SHBA-të janë aleati jonë, Korrupsioni është armiku i të gjithë shqiptarëve. Do shkojmë në këto zgjedhje për të ndryshuar republikën. Partitë e vjetra të Shqipërisë po bëjnë çmos të mbajnë mbërthyer Shqipërinë”, theksoi Blushi.
