Presidenti i Kosovës Hashim Thaçi ka pritur të enjten në Prishtinë drejtuesit e tre partive shqiptare të Maqedonisë, Ali Ahmetin (BDI), Kasam Bilallin (Lëvizja Besa) dhe Ziadin Selën (koalicioni Aleanca për Shqiptarët).
- Thaçi, përmes një njoftimi një Facebook, bën të ditur se me bashkëbiseduesit e tij është diskutuar mbi nevojën e një bashkërendimi më të mirë ndërshqiptar në Maqedoni, duke u mbështetur në respektimin e vullnetit të votuesve dhe në riafirmimin e përcaktimeve programore dhe strategjike.
“Aliu, Bilalli dhe Ziadini shprehën gatishmërinë e tyre për t’u angazhuar maksimalisht në përfaqësimin sa më të mirë të interesave të shqiptarëve dhe të prosperitetit e stabilitetit afatgjatë të Maqedonisë”, – thotë presidenti Thaçi.
Takimi bëhet pak ditë para se presidenti maqedonas Gjorgje Ivanov t’i dorëzojë mandatin për formimin e qeverisë së re kandidatit të partisë që fitoi më shumë vende në parlament, në zgjedhjet e 11 dhjetorit.
Partitë shqiptare, nga të cilat varet formimi i qeverisë së Maqedonisë, thonë se aktualisht nuk po zhvillohen bisedime me asnjërën prej partive maqedonase për koalicionin e ri qeveritar. Opinioni publik shqiptar, parapëlqen sidomos, një koalicion me Lidhjen Social Demokrate, ndërsa VMRO-DPMNE ka ulur retorikën e ditëve të fundit, duke thënë se ajo ka bërë shumë gjëra pozitive për popullatën shqiptare në vend.
Sipas pritjeve, presidenti Ivanov të hënën do t’i japë mandatin për formimin e qeverisë partisë VMRO-DPMNE; kjo e fundit do të ketë një afat prej njëzet ditësh për formimin e kabinetit; në të kundërt, mandati i kalon partisë së dytë, në këtë rast Lidhjes Social Demokrate.
Burimi: VOA
