Ambasada amerikane në Tiranë ka përshëndetur vendimin e Gjykatës Kushtetuese për rrëzimin e ankimimit të Partisë Demokratike për ligjin e Vetting-ut.
“Ambasada e SHBA në Tiranë mirëpret vendimin e Gjykatës Kushtetuese për ligjin e Vetting-ut. I bëjmë thirrje të gjitha partive politike të respektojnë vendimin e Gjykatës. Gjithashtu, nxisim udhëheqësit shqiptarë të punojnë me shpejtësi për të zbatuar të gjitha reformat historike të sistemit të drejtësisë në Shqipëri. Një reformë kuptimplotë që i largon gjykatësit dhe prokurorët e korruptuar nga sistemi gjyqësor gëzon mbështetjen e publikut të gjerë dhe është një prioritet kryesor i Shteteve të Bashkuara në Shqipëri”, thuhet ne deklaratë.
Ndërkohë në reagimin e Delegacionit të Bashkimit Evropian në Tiranë theksohet se BE do të ofrojë mbështetje për procesin e verifikimit të gjyqtarëve dhe prokurorëve në mënyrë që ky proces të jetë tërësor dhe i besueshëm.
Duke shtuar se Be i kushton vëmendje të veçantë vendimit të Gjykatës Kushtetuese, bën thirrje për nisjen e zbatimit të reformës nga autoritetet shqiptare.
REAGIMI I BE
Bashkimi Evropian i kushton vëmendje të veçantë vendimit të sotëm të Gjykatës Kushtetuese për shpalljen e ligjit të vetingut në përputhje me kushtetutën e Shqipërisë.
BE-ja i inkurajon autoritetet shqiptare të nisin me shpejtësi zbatimin e vlerësimit të gjyqtarëve dhe prokurorëve. Kjo është thelbësore për përparimin e procesit të anëtarësimit të Shqipërisë në BE dhe është pritur gjatë nga qytetarët shqiptarë.
Komisioni Evropian do ta mbështesë Shqipërinë për kryerjen e një procesi vetingu tërësor dhe të besueshëm, duke udhëhequr Operacionin Ndërkombëtar të Monitorimit.
