Ambasadori rus në Turqi, Andrey Karlov, është qëlluar për vdekje nga një person i armatosur i cili hapi zjarr në ceremoninë e çeljes së një ekspozite fotografike në Ankara.
Ministri i jashtëm turk Mevlut Çavusoglu ka anuluar një vizitë në Ukrainë e cila ishte caktuar për muajin dhjetor për shkak të vrasjes së ambasadorit rus në Ankara, tha një zyrtar nga Ministria e Jashtme turke.
Ministri i jashtëm turk Mevlut Çavusoglu ka thënë se është vendosur të ndërrojë emrin e rrugës ku gjendet ambasada ruse në Ankara duke i vënë emrin “Karlov” në nder të ambasadorit të vrarë.
Ankaraja do të bëjë çdo përpjekje për të hetuar vrasjen e ambasadorit rus dhe ata që janë fajtorë do të dënohen, tha ministri i jashtëm turk Mevlut Çavusoglu, gjatë takimit me homologun e tij rus, Sergej Lavrov, të martën në Moskë.
Rusia ka falënderuar Turqinë për reagimin e menjëhershëm për “vrasje barbare” të ambasadorit rus, tha ministri i jashtëm rus Sergej Lavrov.
Një ekip prej 18 specialistësh nga Rusia do të marrin pjesë në grupin hetimor të ngritur në Turqi për hetimin e kësaj vrasjeje. Lavrov shtoi se vrasja e diplomatit do të hetohet bashkërisht nga Moska dhe Ankaraja.
Ministri i jashtëm rus vuri në dukje gjithashtu se vrasja e ambasadorit rus është kryer për të penguar përpjekjet ruso-turke në luftën kundër terrorit. /Marrë nga tv rus RT. Përshtati: Opinion.al
