Policia e Elbasanit ka arrestuar diten e sotme autorin e dyshuar te vrasjes se 19-vjeçarit diten e djeshme, Gazmend Sllami. Ende nuk ka detaje per identitetin apo motivin e vrasjes, por pritet qe Policia te reagoje nga momenti ne moment.
NGJARJA
I riu del nga banesa pas një telefonate, e vrasin në rrethana ende të paqarta.
Ngjarja ndodhi në fshatin Gur i Zi të Elbasanit, kur 19 vjeçari Gazmend Sllami u gjet i vrarë me plumb në zemër. Kanë qenë familjarët e tij, që rreth orës 16:00 të ditës së djeshme dëgjuan të shtënën e një arme në një kodrinë, 200 metra larg banesës së tyre. Vonesa e djalit, që kishte dalë rreth 2 orë më parë pas një telefonate dhe nuk ishte kthyer më, i ka vënë në alarm.
Ata dhe kanë nxituar drejt vendit nga ku erdhi e shtëna e armës çifte dhe gjetën djalin 19 vjeçar të mbuluar me gjak. Familjarët menjëherë kanë tentuar ta lëvizin nga vendi me qëllim që t’i japin ndihmën e parë, duke e çuar atë në spital. Por, sipas Policisë, i riu ka gjetur vdekjen e menjëhershme. Edhe mjekët pohojnë se ai ka shkuar i vdekur. Policia sapo ka marrë informacionin për një vrasje në fshatin Guri i Zi ka shkuar menjëherë në vendin e ngjarjes dhe ka nisur të marrë në pyetje si fillim familjarët e viktimës. Ata kanë pohuar për Policinë se nuk kanë pasur asnjë konflikt dhe se djali i tyre nuk ka pasur asnjë problem me persona të tjerë. Ata i pohuan grupit të hetimit dyshimin se vrasësi e ka telefonuar djalin e tyre para se të kryente krimin.
“Djali nuk ka thënë në shtëpi se ku po shkonte, por menjëherë pas telefonatës, ai doli. Ne nuk është se dyshuam se kjo telefonatë ishte e fundit për djalin tonë. Ai nuk kishte asnjë problem dhe konflikt. Nuk na kishte thënë diçka të tillë. Pas telefonatës doli menjëherë, por nuk na tha se kush e telefonoi dhe pse do të dilte”. Kështu janë shprehur familjarët e 19-vjeçarit, të cilët janë marrë në pyetje nga policia për të mësuar nëse i riu i vrarë mund të ketë pasur konflikte, çka mund ta bënte më të lehtë identifikimin e autorit. Burime nga Policia bënë të ditur se janë duke hetuar thirrjet e fundit të të riut, gjë që mund të identifikojë autorin. Nuk ka ende të dhëna në lidhje me shkakun e mundshëm të vrasjes, ndërsa sipas grupit të hetimit, nuk përjashtohet asnjë pistë. Policia ka marrë në pyetje edhe fqinjë e shokë të 18vjeçarit, por dëshmia e tyre nuk ka qenë ndihmëse. Mësohet se Gazmendi ishte djali i dytë i familjes Sllami që kishte tre fëmijë. Dyshohet të kenë qenë të paktën dy persona me të cilët është takuar viktima.
PISTA E KONFLIKTIT
Viktima Gazmend Sllami nuk ishte as bari dhe nuk kishte as ara që të shkonte në kodër. Ky fakt hedh dyshime se i riu ka dalë të takojë dy persona që i ka njohur, prandaj edhe dyshohet se autorët e krimit mund të jenë miq të tij, por jo nga fshati Guri i Zi, por nga fshatrat përreth tij. Blutë e Elbasanit po hetojnë në shumë pista, ku mes tyre nuk përjashtohet as një sherr mes adoleshentësh. Sakaq, policia ka nisur krehjen e zonës, pasi dyshon se autori ende fshihet mes maleve. Përvec familjarëve, në pyetje janë marrë fqinjë dhe shokë të 19 vjeçarit. /Panorama
