Nuk është hera e parë që deputeti i PS, Parid Cara del kundër ministrit të Shëndetësisë Ilir Beqaj. Përmes një statusi në facebook ai kërkon që Beqaj të japë dorëheqjen pasi po krijon një kosto të madhe për mazhorancën qeverisëse. Kësaj radhe merr shkas nga videoja e transmetuar në STOP ku Beqaj shkarkon me telefon drejtorin e Fondit të Sigurimeve që nuk shkoi në mbledhje partie. Ndërsa më herët, Cara ka shkruar se në Kavajë, Beqaj mban drejtor një të paaftë dhe të korruptuar.
Reagimi i plotë i Parid Carës në facebook
Pas videos së transmetuar pak ditë më parë ku ministri i Shëndetësisë, Ilir Beqaj është përgjuar teksa shkarkon me telefon një drejtor, ka ngjallur me shumë të drejtë reagim negativ në opinionin publik.
Ministri, në kundërshtim me të gjitha procedurat ligjore, e konsideron pozicionin që i ka besuar kryeministri, si pronë të cilën mund ta përdorë si të dojë dhe jo si një post që mund të drejtohet vetëm brenda kornizës së parashikuar nga ligji.
Një politikan i përgjegjshëm, pas asaj telefonate të transmetuar në emisionin “Stop” duhet të jepte dorëheqjen menjëherë. Kjo qeveri dhe kjo maxhorancë nuk mund të mbajnë kosto që nuk lidhen drejtpërdrejtë me punën e saj, por me tekat dhe arrogancën e një ministri.
Ilir Beqja duhet të japë dorëheqjen dhe të largohet, pasi çdo ditë më shumë ai në pozicionin e ministrit është kosto e panevojshme për Qeverinë në sytë e opinionit publik.
