Tirana në basketboll për meshkuj nuk është ndalur as në Shkodër nga kampionët në fuqi të Vllaznisë. Në ndeshjen e luajtur pasditen e djeshme në “Qazim Dervishi”, ata kanë fituar 84-66 por në fakt, rezultati nuk tregon shumë gjëra që ndodhën në këtë takim. Një sherr mes basketbollistëve të dy ekipeve në fundin e periodës së parë ndikoi në ecurinë e mëtejshme të takimit. Vllaznia e nisi mirë ndeshjen. Lojtarët e saj u panë me shumë dëshirë në fushë dhe këtë e demostruan në 10 minutat e para që i mbyllën me rezultatin 26-19. Edhe në të dytën, vendasit u mbajtën ritmin, duke e mbyllur atë 21-25 dhe me 3 pikë avantazh, shkuan në pushimin e ndeshjes. Trajneri Gjeçaj e dinte çfarë e priste. Largimi me teknike përjashtimi i Ndojës dhe Dodë Lekndrajt, i ka prishur jo pak punë. Po ashtu, dy lojtarë të tjerë, Daniel Lekndreaj dhe Shabani i plotësuan shpejt 4 gabime personale dhe kjo pati ndikimin e saj.
Me të filluar pjesa e dytë, dy tripikësha të Karaj kthyen rezultatin në favor të Tiranës dhe ai nuk do ndryshonte deri në fund, madje veç do thellohej. Këtu ndikoi edhe dalja i dëmtuar nga fusha e kapitenit Bërdica e më pas edhe Shabani plotëson numrin 5 të personaleve dhe kjo bën që kontigjenti i lojtarëve në pankinën shkodrane të zvogëlohej së tepërmi. Tirana e shfrytëzon këtë dhe duke falë përvojës së lojtarëve të saj, do të fitonte periodën e tretë 25-14, të katërtën 15-5, duke bërë që e gjithë ndeshja të mbyllej në shifrat 66-84 në favor të bardhebluve, të cilët nuk ndalen në rrugën e tyre drejt titullit kampion. Vllaznia tregoi se mund të rivalizojë dhe me ndonjë përforcim të mundshëm në janar, kjo mund të realizohet.
INCIDENTI – Gjithçka ka ndodhur kur kishte edhe 9 sekonda lojë për t’u mbyllur perioda e parë e ndeshjes. Një aksion i normal loje i Tiranës, ka përfunduar në një sherr masiv mes lojtarëve. Ndoja duket se ka diçka për të sqaruar me amerikanin Johnson e më pas, atë e pasojnë edhe Shima me Dodë Lekndreajn dhe kjo mjafton që në rrëmujën e krijuar të përfshihen të dy ekipet. Karaj duket se bën një gjest të pahijshëm dhe trajneri Gjeçaj është shumë i revoltuar me të. Po ashtu edhe tifozët e pranishëm në pallatin e sportit “Qazim Dervishi” marrin zjarr. Fyerjet në adresë të ekipit të Tiranës, por sidomos të Karajt, nuk reshtin. Në ambjentet e pallatit të sportit shtohen shumë punonjësit e rendit që mundohen të qetësojnë gjithçka por për këtë ndikojnë edhe drejtori i Vllaznia, Mark Kroqi, inspektori i klubit Astit Zaganjori, trajneri i boksit Zef Gjoni etj.
