Ministri i Mjedisit, Lefter Koka është kundër vendosjes së akcizës për gazin e lëngshëm që përdoret për automjete, taksë kjo që kërkohet nga Ministria e Financave.
“Do kërkoja që të paktën ky zë në paketën fiskale të rishikohet. Nuk po them të subvencionohet, por s’mund t’i vihet akcizë pasi janë rreth 3 për qind e automjeteve që sot përdorin gazin e lëngshëm dhe nuk besoj se prishen ekuilibrat”, deklaroi Koka.
Ai shpjegoi se ky taksim është edhe kundër politikave të BE për uljen e ndotjes nga djegia e karburanteve. “Po ta shohësh si shifër, nëse kemi thënë se do investohen deri në vitin 2030 miliona euro dhe në këtë zë është rreth 100 milionë euro, presupozohet investim nga privatët. Çka do të thotë që çdo qytetar që disponon një automjet monton një impiant gazi që e blen me kosto të ulët dhe në këtë rast ne duhet t’i stimulojmë dhe jo t’i vendosim akcizë”, nënvizoi ministri gjatë raportimit për buxhetin ne Komisionin e Veprimtarisë Prodhuese.
Në paketën fiskale qeveria ka parashikuar vendosjen e një akcize prej13 lekë/ litër për gazin e lëngshëm që përdoret nga automjetet.
