Pas lajmeve në media se Qeveria do subvencionojë përdoruesit e makinave të vjetra për të blerë makinë të re që ulen ndotja, ka reaguar Ministria e Mjedisit duke sqaruar se kjo skemë ende nuk është konsultuar me institucionet e tjera.
Përmes një deklarate, Ministria e Mjedisit sqaron se Vlera 15 milionë euro e lidhur me një skemë subvencionimi për sektorin e makinave është sugjerim i draftit për Planin Kombëtar të Cilësisë së Ajrit, që do t’i nënshtrohet një procesi të gjatë të konsultimit me institucionet e linjës, me publikun dhe të gjitha palët e ndikuara.
Vetëm pas përfundimit të këtij procesi Plani kombëtar parashikohet te miratohet në korrik 2017.
Ja deklarata:
Në kuadër të projektit te Bashkimit Evropian IPA 2013 “Asistencë Teknike për Forcimin e Kapaciteteve Institucionale të Ministrisë së Mjedisit për Zbatimin e Legjislacionit Evropian për Mjedisin dhe Klimën” IBECA, në datë 1 Nëntor 2016, Ministria e Mjedisit dhe Delegacioni i Bashkimit Europian organizuan takimin prezantues të draftit të parë të Planit Kombëtar të Veprimit të Cilësisë së Ajrit.
1. Masat e propozuara janë sugjerime të ekspertizës së huaj, bazuar në praktikat më të mira evropiane dhe më gjerë që kanë shërbyer si mekanizma për përmirësimin e cilësisë së ajrit të mjedisit në ato vende;
2. Masat e propozuara në plan nuk janë konsultuar dhe as dakordësuar akoma as me stafin e brendshëm të Ministrisë së Mjedisit dhe as me institucionet përgjegjëse si: Ministria e Ekonomisë, Tregtisë dhe Sipërmarrjes; Ministria e Transporteve; Ministria e Financave; apo palët e tjera të ndikuara;
3. Vlera 318 milionë euro për përmirësimin e cilësisë së ajrit është parashikim i BE-së përmes projektit IBECA për të arritur normat e lejuara për cilësinë e ajrit sipas standarteve të BE-së.
4. Vlera 15 milionë euro e lidhur me një skemë subvencionimi për sektorin e makinave është gjthashtu sugjerim i këtij draft plani për këtë sektor (është vetëm 1 nga fushat që prek cilësinë e ajrit sic edhe është theksuar në Njoftimin për Shtyp lëshuar nga Ministria e Mjedisit me dt. 2 nëntor 2016,, http://www.mjedisi.gov.al/al/newsroom/lajme/ministria-e-mjedisit-dhe-delegacioni-i-be-se-prezanton-draft-planin-kombetar-te-menaxhimit-te-cilesise-se-ajrit-pritet-te-hyje-ne-fuqi-ne-2017-en ). Sqarojmë se qeveria shqiptare nuk ka konsultuar asnjë vendim të llojit subvencionim makinash.
5. Plani Kombëtar i Veprimit të Cilësisë së Ajrit do t’i nënshtrohet një procesi të gjatë të konsultimit me institucionet e linjës, me publikun dhe të gjitha palët e ndikuara. Vetëm pas përfundimit të këtij procesi Plani kombëtar parashikohet te miratohet në korrik 2017.
