Drejtori i Policisë greke, Konstantinos Tsouvalas, ka vizituar sot Tiranën, ku është pritur dhe nga ministri i Brendshëm, Saimir Tahiri dhe drejtori i Policisë, Haki Çako. Në bazë të komunikatës që nisi Ministria e Brendshme mësojnë se Tahiri i ka kërkuar llogari për kthimin e shqiptarëve në kufi. Gjithashtu mësohet se ministri i ka kërkuar të zbardhen dy ngjarje të rëndë ku kanë humbur jetën dy shqiptarë në Greqi, përkatësisht në burg dhe polici.
“Tahiri kërkoi nga pala greke të respektohet lëvizja e lirë e shtetasve në zonën “Shengen” dhe të mos kthehen shtetas shqiptarë në kufi pa shkaqe ligjore e të motivuara mirë”, thuhet në njoftim.
Ndërsa kërkoi hetime transparente dhe të plota për 2 rastet e humbjes së jetës në rajonet e policisë greke të shtetasve Ilia Kareli dhe Pëllumb Marknikollaj, si edhe kërkoi të respektohen të drejtat themelore të shtetasve shqiptarë, pavarësisht faktit nëse janë të ndaluar ose arrestuar nga autoritetet ligjzbatuese të Greqisë.
Ministri Tahiri u kërkoi autoriteteve greke të marrin të gjitha masat në mënyrë që të mos përsëriten raste të tilla në të ardhmen.
