Mjeku i Partizanit, Dhimosten Gjini, për “Panorama Sport” tregoi momentet e panikut që përjetoi në situatën e krijuar me tifozët, të cilëve u dha ndihmën e parë në fushë. Në kohën që ka ndodhur incidenti në shkallët e stadiumit, mjeku i të kuqve ka qenë pranë mbrojtësit të Skënderbeut, Kristi Vangjeli, i cili ka qenë i dëmtuar dhe po merrte ndihmën mjekësore në fushë.
Ja si e pa mjeku i të kuqve nga afër “horrorin” në “Elbasan Arena”:
“Në kohën që ndodhi ‘horrori’ me tifozët, unë po merresha me situatën e Vangjelit, i cili pas përplasjes me Torasën pati probleme në fushë. Në aspektin humanitar, u afrova dhe asistova te ndihma që po i jepej mbrojtësit të Skënderbeut. Pas stabilizimit të Vangjelit, ne të stafit mjekësor të Partizanit na thërrasin me urgjencë për të ndihmuar tifozët e lënduar. As që e vura re se çfarë ndodhi, pasi isha i përqendruar te Vangjeli.
Pastaj ne si staf u vumë para një situate shumë të vështirë, kryesisht me rastin e asaj vajzës që pati probleme. Ajo ishte në një gjendje konvulsive dhe epileptike. Aty m’u desh që përveç ndihmës ndaj vajzës së lënduar të largoja edhe njerëzit që bërtisnin dhe na rrinin mbi kokë duke mos na lënë të qetë që të jepnim ndihmën e specializuar. Situata ishte dramatike, por me ndihmën që i dhamë në fushë, duke menaxhuar edhe njerëzit që kishim mbi krye, arritëm që ta kalojmë situatën pa probleme.
Por puna jonë nuk mbaroi me kaq, pasi në fushë u krijua vërtet një moment urgjence. Na u desh që të mjekonim edhe dy-tre tifozë të tjerë që kishin plagë të ndryshme. Përveç asaj vajzës në fushë, patëm edhe një rast tjetër kritik, pasi një tifoz humbi dy herë ndërgjegjen dhe ndjenjat, por arritëm që ta menaxhojmë me sukses edhe këtë rast”.
Paniku
“Sigurisht që paniku ishte i pranishëm, aq sa njerëzit nuk na linin të qetë që të jepnim ndihmën tonë. Normal që reagimi i tyre është i justifikueshëm në atë rast, pasi shikon të afërmit apo miqtë e tyre që po vuanin. Personalisht, nuk më ka ndodhur ndonjëherë që të jem përpara një situate të tillë në një ndeshje futbolli. Fatmirësisht arritëm që situatat t’i përballonim me sukses dhe gjithçka kaloi pa probleme të mëdha”.
