Nuk do tu falen bizneseve detyrimet e pas 2012-s, siç u premtua në korrik, përkundrazi, ato do mblidhen edhe me forcë. “Nuk ka falje të detyrimeve”, ka përsëritur ministri i Financave, Arben Ahmetaj në një konference për mediat. Sipas tij, nga viti 2010 deri ne 2014 do të ketë një lehtësi për ata që paguajnë detyrimin e plotë, por jo falje.
“Kush paguan detyrimet do të ketë një lehtësi në interesa dhe në gjoba, ndërsa ata që nuk e paguajnë do t’i mblidhet detyrimi me forcë me anë të gjithë instrumenteve”, tha me tej ai.
Drafti paraprak i faljes fiskale, propozuar në korrik me bujë të madhe nga Financat, parashikonte faljen e plotë të detyrimeve deri në vitin 2011 dhe pas këtij viti do të falej 30% e detyrimit, gjobat e kamatëvonesat për ata që paguanin pjesën tjetër prej 70% të detyrimeve.
Në shtator drafti i faljes u la pezull, pas kundërshtimeve të FMN-së, e cila kërkoi me forcë që të fshiheshin vetëm ato detyrime që ishin të pamundura për t’u mbledhur dhe të bëhej maksimumi për të arkëtuar detyrimet e mbledhshme.
Financat nuk kanë dalë ende me një draft të ri, por Ahmetaj ka zbuluar disa nga detajet, ku tashmë do të fshihen vetëm detyrimet deri në 2010-n , ndërsa nga 2010-2014 do ketë falje gjobash e kamatash për ata që shlyejnë detyrimin e plotë (jo falje 30% të detyrimit nëse paguan pjesën tjetër siç ishte në variantin e parë). Nuk është ende e qartë se çfarë do bëhet me gjobat masive që u vunë gabimisht nga sistemi në qershor 2016, raporton BW.
